All India Redio News Aizawlin a tar lang danin Manipur mi Mizorama an sa himna zawnga lo lutte enkawlna sum Sorkar laipui aţanga dawn a la ni lova, Mizoram sorkar din Executive Committee on Internally Displaced Persons of Manipur in Mizoram chuan July 3 atangin vehbur a khawn tan dawn thu hriat a ni a.
Manipur-a buaina a chhuah ni May ni 3 hnu lawk May ni 5 atang khan Zofa eng emaw zat chu an sa himna zawngin Mizoramah an rawn tlan lut a. Tunah hian mi 12,000 vel an awm mek a. Hetianga in leh lo chan emaw luah ngam lova state danga raltlante hi sorkar laipui chuan chhawmdawlna atan anmahni lo mikhualtu state sorkar hnenah tanpuina sum a pe thin a. Manipur mi Mizorama awmte tan erawh chuan sorkarin a dil hnu ni 40-ah pawh sorkar laipui hi a la ngawi reng a. Mizoram sorkar aiawh a Tourism Minister Pu Robert Romawia Royte kaihhruai official-ten June ni 16-a Delhi a Union Home Secretary Ajay Kumar Bhalla an hmuh hnu leh ani pawhin pek thuai an tum thu a sawi hnuah tun thlengin Delhi lam atangin thu leh hla dawn a la ni lo a ni.
Hetih lai hian ‘One Nation One Ration Card’ hnuai-ah Manipur atanga raltlan awmten Retailer atangin buhfai an lei thei tawh a. Ration card nei lote pawhin an ration card nambar emaw aadhaar card number emaw an hriat chuan an la thei a ni. Sorkar pawhin Supply department kal tlangin Manipur atanga raltlante tan hian buhfai quintal 2,300 chuang a pek chhuah tawh thu hriat a ni.
