Manipur buaina avanga Mizoram mi leh sa tangkhangte lak chhuah vek an nih tawh

0

All India Radio News Aizawlin a tar lan danin Home Minister Pu Lalchamlianan Manipur buaina avanga Mizoram mi leh sa tangkhang te hriat theih chin chu lak chhuah vek an nih tawh thu a sawi a.

May 11 khan sorkar hotu pawimawhten Manipur buaina avanga Mizoram mi leh sa Imphal leh a chhehvela tangkhang te Mizoram sorkarin a lak chhuah dan thlirhona Aizawla neihnaah he thu hi sawiin Pu Lalchamliana chuan hemi atana hmalatu Chief Minister, Chief Secretary, DGP, Home department official te leh department hrang hrang, theih tawp chhuahtu zawng zawng te, YMA, tlawmngai pawl zawng zawng te leh zirlai pawl te chungah lawmthu a sawi a, mipuiten tha taka an thlawp tlatnaah lawmthu a sawi a, chanchinbu miten thuchhuah puitling tak nen thu dik leh belh chian dawl chauh an chhuah thin avangin lawmthu a sawi bawk a ni.

Home Commissioner Pu H. Lalengmawia chuan Imphal atanga hruai chhuah zawng zawng hi mi 262 an ni tih he hunah hian a sawi a. Lak chhuahte zingah hian zirlai an tam ber a, hna thil vanga training leh damdawi ina inentir, admit lai mekte bakah tul vanga zin te an awm bawk a. A tira lak chhuah ngai, in-report mi 43, sorkarin Thlawhtheihna ticket a laksak tawh a, anmahnin remchan zawkna avanga ticket lo la ve an awm a, ticket hi refund theih a nih loh avangin sorkarin a chawi thlawn tih a tar lang bawk a.

Meeting-ah hian Arunachal Pradesh-in Mizoram sorkar puihna a rawn ngen angin an State mi leh sa zirlai naupang 4, Churachandpur-a tangkhang te Mizoram kal tlangin lak chhuaksak an nih thu leh May 11 khan him dam takin Itanagar-ah an thleng tih a tar lan bawk a ni.

Sorkar thuchhuah tar lan danin May 11 thleng khan sa himna zawnga Mizorama rawn lut mi 4061 an awm a, Aizawlah 1312, Champhaiah 68, Kolasib-ah 1142, Serchhipah 4, Khawzawlah 12, Saitualah 1523 an awm tawh a ni.

Supply Department lamin raltlante tan hian buhfai quintal 800 chuang an pe chhuak tawh tih tar lan a ni a, District tina thuneitute pawhin ruahmanna mumal tak neiin hma an la mek tih  tar lan a ni a.

Meeting chuan Manipur-ah internet tihnun leh a nih hmel tawh avangin Youtuber-te leh social media hmangtute fimkhur se an duh thu leh thu belh chian dawl lo, boruak timuang zawng ni lova, tichhe zual thei chi theh darh lo turin an duh thu tar lan a ni bawk.

Share.

Leave A Reply

Exit mobile version