India, Manipur State, Imphal Jail-ah Myanmar raltlan an man mi 3, March 2 khan bail-in an chhuah thu hriat a ni.
Bail-a an chhuah tak hi kum 72 mi Pu Zam Khaw Sil Dal Thang, kum 20 mi William leh kum 23 mi Sominthang te an ni a. Anni hi January thla vel khan Moreh township-a raltlan mi 80 chuang an man zinga mi te an ni.
Pu Zam Khaw Sil Dal Thang hi a hriselna a that loh avanga chhuah a ni a. William-a leh Sonminthang te erawh zirlai an nih avanga chhuah an nih thu Myanmar raltlan tanpuitu Chairman Pu Thanseia chuan a sawi a ni.
Tun dinhmunah hian Imphal Jail-ah Myanmar raltlan mi 100 chuang vel an la khung khawm a. In enkawlna a that tawk loh avangin an hriselna an ngaihtuahawm thu a sawi zui bawk a ni.
February 26 pawh khan kum 32 mi Pu Lam Khaw Suan Guite, Imphal Jail-ah a boral thut tawh bawk a ni.
