India, Manipur State-a Myanmar raltlan mi 700 chuang te chu India ramri-a Assam Rifle-ten an hnawh chhuah chungchangah enkawl zui turin Mizoram CM chuan a sawi a.
July 22 khan Sagaing region, Khampat khuaah Military council sipaite leh tualchhung PDF te inkahna avangin tualchhung mipui 3000 chuang vel an tlanchhia a, tlanchhe zinga mi 718 te chu India Manipur State, Chandel District New Lajang khaw chhehvela an awm hnuah India sipai Assam rifle-ten an hnawh chhuah thu hriat a ni a.
Pu Zoramthanga chuan kum 1971 khan Pakistan atanga raltlan mi a nuai tel chu India,West Bangal State-ten an lo dawngsawng tawh a, chutiang angin India hian Myanmar raltlan te hi an chhawmdawl ve a tul a ni tiin a sawi a.
Myanmar raltlan 718 te chungah ram chhung luh phalna leh awm phalna chungchangah khauh zawka hmala turin Manipur State sorkar Director General Vineet Joshi chuan Assam rifle te thu a chah thu hriat a ni a.
An hnawh chhuah tak Myanmar raltlan naupang 301 telin mi 718 te chu Myanmar, Tamu township khaw hrang hrangah an awm kual a, awmna leh ei in chungchangah an harsat hle thu a bul hnaia mi te hnen atanga hriat a ni.
Kum 2021-a Military council-ten thuneihna an lak atang hian India, Mizoram State leh Manipur State-ah raltlan mi 40000 chuang an awm tawh thu hriat a ni bawk.
