Chin state, chhim lam Matupi khuaah October ni 12 khan military council sipaiten tualchhung mipuite hriatah huan lo lama kal lo tur leh Matupi khaw bul hnaia rahpuah bomb kam vek a nih thu an puanzar avangin, mipui lam chu thlabar leh dinhmun harsa taka kara an awm thu hriat a ni.
Tualchhung mi pakhat chaun, “Sipaiten vawiin lamah tumah chhuak lo turin min ti a. Khaw bul velah bomb kam a nih thu an sawi a. Khaw pawn lam dai leh a bul hnaia kal an khap a, mahni huan leh lo lamah pawh a kal theih loh. Hetiang a nih chuan ei tur kan nei lo mai dawn a, he lamah chuan chawhmeh tur zawn chawp a ngai a, a harsa a. Tunah khawiah mah a kal theih loh an ti a. Chu bakah thalaite leh mipui lam intangrual a nih chuan dan anga khin in ni ang min ti pawh a ni,” tiin a sawi.
Military council sipaite chuan Chin state, Mindat leh Matupi inkar kawnga leiminte thenfai a nih laia silaia inkap lo tur leh mahni huan, lo lama kal lo turin October ni 12 tlai lam khan khaw chhungah an puang tih hriat a ni a.
Military council sipai tam tak chu nizan lamah Lemro lui bulah an riak a, Matupi khua, security atan police 100 chuang dah an tum thu pawh hriat a nih rualin Chin state chhunga twonship tam takah sipai leh police force engemaw zat inzarpharh tumin an kal chhuak mek tih pawh hriat a ni.
Miliary council chuan September ni 23, zan dar 6 vel atang khan Chin state chhunga Township 8-ah internet line a titawp vek bakah, sipai pawh a chheck khawl mek bawk a ni.
