Chin State chhim lam Matupi township Matupi leh Paletwa kawngah Military council sipaite CDF-Matupi ten an lambunnaah Military council sipai 12 an thi a, hliam an awm nual thu hriat a ni.
Matupi khawpuia innghat Military council Khah Lah Yah (LIB) 304, sipai 80 rual ten Motor 3-in March 20 khan Matupi leh Paletwa kawnga Thebui camp, ralthuam leh ration pe tur CDF-Matupi Battalion ten an lambun thu CDF-Matupi Battalion-a thupuangtu Aron chuan heti hian a sawi.
“Thebui camp an thlen hma vawi 4 an inkahnaah Military council sipai 12 an thi a, keini lam thi leh hliam an awm lo. Inkahnaah a la nasa mai thei” tiin CDF-Matupi thupuangtu Aron chuan a sawi a ni.
March 20 zing dar 10:00 khan Military council sipai leh CDF-Matupi te Matupi leh Paletwa kawng mile 6-ah vawi khat, chawhnu dar 1:00-ah mile 7 leh mile 8-ah vawi khat an inbei a, hemi ni hian Military council sipai 3 an thih thu hriat a ni.
March 21 tuk pawh khan Matupi leh Paletwa kawng mile 9 leh Tui Sit khaw inkarah vawi 2 an inkap leh a. Military council sipai 9 an thi a, hliam an awm nual thu CDF-Matupi ten an thuchhuahah an tarlang a ni.
Matupi leh Halkha kawnga Military council sipai buk inkhuar ten ralthuam lian an kah chiam avangin Walipi khuaa tualchhung mi te an hliam nual thu hriat a ni bawk.
