Chin State, Matupi township-ah tun hnai lawk khan Military council sipaiten an beihnaah tualchhung mipui tlan chhe zingah naupang kum 7 mi leh kum 60 mi nu pakhat an hriselna an that loh avangin an boral thu hriat a ni a.
Matupi khuaa innghat Khah Lah Yah (IB) 140, Military council sipaiten Matupi leh Mindat kawngpuiah June thla tir atang khan an bei tan a. Hetia an beih avang hian Mindat Matupi kawng, mel ban 90-na ChiangPian khua, mel ban 84-na Ramting khua leh mel ban 81-na Hmuntung khuaa tualchhung mipuite Mindat township lamah an tlanchhiat hlawm thu hriat a ni a.
Hetia an tlanchhiat lai hian June 5 khan kum 60 mi nu pakhat leh June 9 khan kum 7 mi naupang pakhat an hriselna a that loh avangin an boral thu Mindat Township IDPs Camp Management Committee-ten an thuchhuahah an tar lang a ni.
Raltlante hian an hak lai leh ei in chawp tur chauh an ken chhuah avangin ei in tur leh damdawi bakah pawimawh hrang hrang an mamawh zual thu hriat a ni a.
Mindat Township IDPs Camp Management Committee-te hian June 9 khan an raltlanna hmun hrang hrangah tlawh kualin buhfai ip 61 leh tel (Chhitui) bur 40 chuang an pek thu hriat a ni bawk.
