Chin state chhim lam, Matupi khuaah military council sipaiten security tikhauhin tualchhung mite awmze nei lova an man thin thu hriat a ni.
January ni 20 zan khan Matupi khua chhung, Khu-bui veng chhung mi 4 te chu military council sipaiten manin an vaw hrep a, intiamkamna an ziahtir hnu, a tuk zing lama an chhuah leh chauh thu Matupi tualchhung mi pakhat chuan heti hian a sawi a.
“Nimin lam dar 3 velah sipai tam tak an rawn kal a. Zan lama chhuak reng reng chu an vuak hrep hnuah an man zui a. Police station-a dah luh chu mi 4 chiah an ni a. A tuk zing lamah chung mi 4 te chu an chhuah a. Intiamkamna an ziahtir a. Eng thil sual mah an ti lo. Khu-bui venga mite an ni.”
Chung man tawk mi 4-te chu East Khu-bui venga cheng, U Khin Maung, U Yaw Ba, U San Aung leh U Aung Tu te an ni a, an haw kawngah sipaiten manin, an vaw hrep tih hriat a ni.
Matupi khua chu sipai hmun pawimawh tak a nih angin, military council battalion LIB 140 leh 304 awmna hmun a ni a, Chin mipui venghimtu pawl nena inkahna nasa tak chhuah thinna township a ni bawk a. Tun hnaiah sipai leh ralthuam phur sipai motor 90 vel a thlen belh leh a.
Matupi township-ah, Sipaiten Chin mipui venghimtu pawl CDF-Matupi tanpuitu an puh civil mi 19 te chu an la man reng a, Matupi lock up-ah dah an ni. Chutih rualin military council sipaiten in tinah lutin chhungkaw hming list (registration) an check thin bawk tih hriat a ni a.
Matupi township-a military council sipaite leh Chin mipui venghimtu pawl te inkara inkahna chhuak avangin, Hakha-Matupi leh Mindat-Matupi motor kawngpuiah motor service a chawl vek a, bungraw phur pawh an tawp vek avangin, khawsakna leh ei leh in tur lamah an tlachhamin thil man a sang chho zel a. Chutih rualin Matupi township chhunga mipui 5000 velin mahni khua chhuahsanin Mizoram state lamah an raltlan mek tih hriat a ni.
