Matupi township-a ni 2 chhung inkahnaah military council sipai 8 an thih thu hriat a ni

0

Chin state, Matupi township, Lailenpi khua atanga Matupi-Paletwa kalna kawnga awm, Hrebawi sipai camp lama operation nei sipai force 150 vel leh Chin mipui venghimtu pawl tangrualte chu March ni 12 atangin an inkap tan a, ni hnih chhunga inkahnaah military council sipai 8 an thih thu hriat a ni.

Military council sipai, Lailenpi khua atanga Matupi Hrebawi sipai camp lam pana kal te chu, La-uk lui dung zuia kea kal Chin National Army (CNA), Chinland Defense Force-Matupi leh CDF-Paletwa ten lambunin an kah thu CDF-Paletwa thupuangtuin heti hian a sawi a.

“Lailenli atangin sipai 150 vel Matupi Hrebawi sipai camp lama force dah belh tumin an rawn kal a, an rawn kal dan pawh Sami lam atanga lo kal lovin, Mara ram, inkahna la awm lohna hmun remchangah hmangin an rawn kal a, mahse kan chet tlatna ram chin paltlang an tum laiin CDF-Paletwa lamin bomb kam hmangin kan bei a, sipai 5 vel a hliam a, ni 13-ah keini tangrual pawl 3-in La-uk lui, Paletwa leh Matupi inrinaah kan lo bei leh a, sipai 7 kah hlum niin, 10 an hliam tih kan hria.”

March ni 13-a ni lenga inkahna nasa takah Chin tangrual pawl lama CNA sipai pakhatin nunna a hlan bawk tih hriat a ni a.

Military council sipaite chu La-uk lui dung zawhin an kal zel a, March ni 14-ah Chin tangrual pawl nen an inkap leh bawk a, mahse thi leh hliam awm zat chiah erawh hriat a la nih loh thu CDF-Matupi lama hruaitu pakhat a sawi a.

Ani chuan, “Tunah Hrebawi lam panin an kal mek a, lui dung zuiin an chhuk thla a, Hrebawi chu an thleng tep tawh, nimin lamah pawh an inkahna a chhuak nasa hle a, tunah pawh an la inkap reng tho, mahse vawiin lama inkahna chhuak chanchin chu hriat chian theih a la ni lo,” tiin a sawi.

Military council sipai pawlin laipui an pawng tawng kah avangin, Tuisawt tlang khuaa chenna in pakhat, Kristian biak in pakhat chu a chhiat phah thu hriat a ni a.

Chutiang bawkin Indo-Myanmar border, Chin state Falam township Rihkhawdar khua ward no. 2, tlang chunga inkulh sipai camp chu Chiland Defense Force tangrual pawlin March ni 12 leh 13 khan an kap a, sipai pathum an kah hlum thu hriat a ni.

Chu bakah, Rihkhawdar police station-a thawk Deputy Sergeant telin police 6 te chu March ni 6-ah Chinland Defense Force lamah CDM zawma an luh thu PDF-Zoland-in thuchhuah a siam a.

Military council sipaite leh Chinland defense force tanrual pawlte inkahna avangin, Rihkhawdar khaw mipui zawng zawng deuh thaw chu ral leh lam India ram, Mizoram state, Zokhawthar lamah March ni 7 atangin an lo raltlan tawh a ni.

Share.

Leave A Reply

Exit mobile version