March 20 khan Matupi khua leh Paletwa khaw inkar Thebui khuaah Military council camp tana ration pe tur Matupi township atanga Military council sipai 80 rual te leh motor 3-a chhuak te CDF-Matupi leh CNA tangrual pawl ten vawi 10 chuang an beihna ni 10 chuang a ni tawh a.
Military council sipai ten Matupi khua leh Thebui camp chhehvel an beihnaah khaw 4-a tualchhung mi 1000 chuang ramhnuaia an tlanchhiatna thla khat chuang a ni tawh a. Ni tam fe ramhnuaia raltlante ei in tur leh damdawi an mamawh zual thu tualchhung mi te hnen atanga hriat a ni.
Tui Sit khuaa kum upa hmeichhe pakhat ramhnuai atanga an khaw lama, a kir leh tumah March 29 thleng khan a awmna chin hriat loh a nih thu hriat a ni a. Lo hal hun velah Military council sipaite avangin ramhnuaiah an la awm hlawm a. Ramchhung leh ram pawna mi ten ei in tur leh damdawi chhawmdawl vat an mamawh thu tualchhung mi pakhat chuan a sawi a ni.
Military council sipai ten mel 34 vela hla an kalna turah kawng zatve pawh an la thlen rih loh avangin tualchhung mi te eng tik nge an khaw lamah an kir leh theih dawn hriat a la ni lova. March 29 pawh khan Kha Laung San camp-ah Military council sipaite leh CDF-Matupi te an inkap chhunzawm a. Military council sipai ten Wa Lan Pi khua leh Ka La khua bakah a chhehvelah ralthuam liana an kah nasat thu hriat a ni bawk.
