Military council sipai hotu Min Aung Hlaia sawmna remna dawhkan kila sawiho tura tih chu KIO (KIA) lamin an tel loh tur thu May ni 5-ah thuchhuah an siam a.
KIO chuan politics harsatna sawiho theihna dinhmun a thlen theih dawn loh avang leh sawm loh tur sawm a, sawi awm zawkte sawm loh chu pawm a harsat thu an sawi tel bawk a ni.
KIO News & Information in-charge Colonel Naw Bu (နော်ဘူ) chuan, “Tun tuma inhmuhkhawmna chu kan tel dawn lo a ni. Kan sawi duh chu politics lama sawihona hmang chauhin kan Myanmar ram politics chu chin fel theih a nih thu kan pawm sa a. Tun tuma sawiho tumna dinhmun han thlir hian politics buaina sawiho theihna dinhmunah a awm lova, chuvangin keini chu kan tel thei dawn lo a ni,” tiin RFA a hrilh a ni.
Min Aung Hlai chuan ethnic armed group hruaitute chu amah ngeiin a hmuh tur thu April ni 11 khan ram chhung TV kaltlangin a sawm a. KIO chuan chu sawmna chu May ni 2-ah official-in a dawng a, mahse an tel loh tur thu May ni 5-ah an puang zar a.
Chutiang bawkin TNLA pawl lam pawhin an tel loh tur thu an sawi chiang a. Tun dinhmuna hriat theih chinah NDAA, RCSS, ABSDF, DKBA, KNU-KNLA-PC (Peace lama inhmang pawl), PILO, ALP, LDU pawlte an tel tur thu hriat a ni a. Tel lo tura hriat theih chin chu UWSA, KIA, AA, MNDAA, TNLA, SSPP, KNPP, ANC, KNU, CNF leh NMSP te an ni.
