Chin State, Halkha khuaa Military council hnuaia Department of Archaeology and National Museum-a State chief officer Pi Ngai Hau Niang chu April 12 khan tu tih hriat loh pawl ten an man thu hriat a ni a.
April 12 tuk khan ralthuam keng pawl tu tih hriat loh ten Pi Ngai Hau Niang chenna inah luhchilhin zawh tur kan nei che tiin an hruai chhuah thu tualchhung mi pakhat hnen atanga hriat a ni.
“Ani hi Military council sipai ten State hminga Chin National Day an buatsaih tum khan Video file a nei niin thalaite hnen atanga hriat a ni a. PDF Uniform ha nia rin ten a chenna inah zawh tur che kan nei tiin an hruai chhuak a, tun thlengin an la chhuah rih lo” tiin a sawi zui bawk a ni.
An man tak Pi Ngai Hau Niang hi Halkah khuaa Culture Office hung chhungah an chhungkuain an cheng a. Military council ten thuneihna an lak hnu pawh khan CDM-ah lut duh lovin subordinate staff te nen hna an thawhho thu hriat a ni bawk.
Hetia an man hnu lawk hian a chenna inah Military council sipaite an thleng nghal a, a fapa an zawt a, an man hnuah an chhuah leh thu hriat a ni.
Tun dinhmunah hian Military council hnuaia sorkar hnathawk officer te an chenna inah awm ngam lovin an biru nual a, thenkhat phei chu an hna atangin an chawlhsan hial thu hriat a ni bawk.
Kum 2021 February 1, Military council ten thuneihna an lak hnu atangin Military council sorkar hnathawk te leh hmun dang atanga Halkha khawpuia Military council office-a hnathawk te kum 2023 May thla ral hma ngeiin an chenna hmun atanga chhuahsan vek tura thupek an ni a. Dan zawm lova tilui an awm chuan a tul anga action an lak dawn thu CDF-Hakha Council ten Aptil 10 khan an thuchhuahah an tarlang a ni.
