Myanmar ramah sipaiin thuneihna a pawng lak hnu, thla 13 chhungin military council sipaiten civil mite chenna in 6158 a hal chhe tawh a, a tam zawk chu sipaite do let nasatna hmunah a thleng a. Sagaing region in hal chhiat zat chu ram puma mi nen khaikhinin zaa 60 vel dawn ani a nih thu Data for Myanmar chuan a tarlang a ni.
Chung in te chu kum 2021 Febraury ni 1 atanga March ni 1, 2022 chhung, ram pum, hmun hran hrang 165-a thleng a nih thu Data for Maynmar chuan a sawi bawk a.
Military council sipaite leh mipui venghimtu pawl sipai (PDF) te inkara inkahna chu ram pumah a chhuak reng a, bik takin, Chin, Kaya, Kayin leh Kachin state bakah Sagaing region, Magui, Mandalay leh Yangon region lamah a ni a. Mipui sipai lamin defensive anga an beih rualin Guerilla attack hmanga an kalpui bawk avangin, military council lam chu a na zawkah an tang tlangpui a ni.
Chung avangin, military council chuan van boruak lam atang, ngawrh takin a rawn chhu zui ta zel a, Sagaing region chhunga awm PDF ho phei chu thah chimit vek tumin hma a la, civil mite chenna in engemaw zat pawh hal chhiain a hma chho zel a. Thla khat chhung ringawt pawhin chenna in 2882 a hal chhia a. January thla chhung khan chenna in 10559 hal chhiahin, December 2021-ah chenna in 960 a hal a, November-ah chuan in 384 a hal chhe bawk a ni.
Chung in leh lote hal chhiat zawng zawng chu a hmuna hal chu tam zawk mahse, jet fighter atanga bomb hmanga hal chhiatte bakah Military council sipaiho uicho Pyusawhthi ho hal chhiat pawh a tel bawk a ni.
