Chin state Falam khuaa National League for Democracy (NLD) MP pakhat leh Sagaing region Kalaymyo-a MP pahihte chenna in chu military council-in an khalhsak leh thu hriat a ni.
Falam khua, Chinmual venga awm MP Pu Ral Hnin-a chenna in chu January ni 19 khan military council-in an kalhsak thu Falam tualchhung mi pakhatin heti hian a sawi a.
“Sorkar taa chhuhsak a ni dawn a, zawrh leh lei khap a ni tih lehkha an tar a. Mi dang inah chuan an tar ve lo, ama inah chiah an tar a ni.”
Pu Ral Hnin chu kum 2015 atangin National League for Democracy (NLD) party atangin Falam twonship, no. 1 constituency atangin State Parliament Member atana thlan tlin a ni a, kum 2020 inthlan pawh khan NLD party atanga thlan tlin tho a ni.
Chutiang bawkin, January ni 19 zing lam khan Sagaing region Kalaymyo MP Pi Siami chenna in leh Kalaymyo Hlai-Ta-Ya venga Regional MP Daw Than Wei Kyaw chenna in chu military council-in a kalhsak bawk a.
“Tukin zing lamah lehkha an rawn tar a, police leh sipai lam an tel ve ve a, an rawn tar a ni. An thuziakah chuan firfiakna lam nena inkaihhnawih avangin, he in hi sokar-in a chhuhsak dawn a, zawrh leh lei khap a nih thu a chuang a ni.”
Pi Siami leh Daw Than Wei Kyaw te chu kum 2015 leh 2020 inthlanah National League for Democracy (NLD) party atanga Parlaiment member atana thlantlinte an ni a.
Chin state-ah military council-in sokar tana a chhuhsak chenna in 5 a awm tawh a, December ni 26-ah Sami khuaa, NLD MP Salai Myo-Thaih chenna in, October ni 30-ah Hakha khuaa Chin National Front (CNF) vice-chairman leh National Unity Government (NUG) sorkar hnuaa Federal Affairs Union Minister Dr. Lian Hmung Sakhong in telin, Chawlbuk venga Rev. Pu Van Chem in pawh a lo kalhsak tawh a ni.
