Chin state chhim lam Paletwa khaw chhunga kum 2 zet raltlana awm IDP (Internal Displace People) thenkhat chu October ni 26 atangin military council-in an khaw lamah a hawtir niin hming tarlan loh raltlan pakhat hnen atanga hriat a ni.
Ani chuan, “Khaw thenkhata awmte chu ni 26 atangin an haw tan a, khaw 9 vel chiah an la haw a, anni chu duhsakin an hawtir hmasa a. A la bang chu an tam mai. La haw lo zat chu mi 3 chuang an la awm ang, an in sak chhia leh sakthatna tur tanpuina la dawng lo an awm nual avangin, an la hawtir lo a. Tunah chuan pawisa an dawn hlawm tawh avangin, haw turin an inruahman tawh a ni,” tiin a sawi.
Paletwa khuaa awm IB 289 battalion commander chuan Paletwa khua raltlan thuneitute chu township general administration office-ah September thla tawp lam khan ko khawmin raltlante anmahni khaw lam hawtir tur leh an inchhia leh siamthat ngaite siam that nan, tanpuina chu October ni 17 khan raltlan thenkhat chu a lo pe tawh a, tunah a hawtir ta a ni.
Military council-in Paletwa khuaa raltlan mpui tana tanpuina a pek danaah chuan chenna in siam that nan Kyat 38600, In chhe vek tawh, a thar sak that ngaite tan Ks. 586000 a pek thu hriat a ni a.
Paletwa khaw chhunga raltlante chu military council-in chenna in siam that ngai atan tiin pawisa tlem te chauh tanpuina a pe a, in lama a hawtir nghal mai avangin, chung raltlan hawten an in leh a chheh vela rah puah bomb phum awmte leh kal kawng that loh avanga an hlauh hle thu raltlan pakhat chuan heti hian a sawi chhuak a.
“Tun hnaiah inkalpawhna kawng a that loh avangin, sawi thiam a har khawp mai. Tun hnaiah Baw-Wa lamah inkahna a chhuak a. Chu mi lam chu keini tan a him lova, kan kal thei dawn lo a ni. Chu bakah rah puah bomb phumte pawh an thenfaisak lo a, motor kawngpuiah mi chiah an thian fai a, khaw chhung leh dai vela mi chu pawi lo turah an ngai ang a, min hawtir a nih ka ring,” tiin.
Chung tanpuina pawisa dawnga mahni khaw lama kir lehte chu Auh-Tin-Ma-Wa, Bai-Wa, Ngha-Phui, Sein-Sin, Paletchaung-wa, Si-Pa-Laung, In-Khu-Wa, Daman-ta, Auh-Mi-Letwa khuate an ni a, mi 1100 vel an ni a, Nan-ma-tan, Wein-wa, Mun-Chaung, Daman-Ta khaw hlawm lam atanga raltlanten tanpuina pawisa an la dawn loh avangin an haw lamah an la haw thei lo tih hriat a ni.
Tunah hian Paletwa khaw chhungah raltlanten WFB atanga tanpuina pek eiturte an tlan mek a, an khaw lama an haw hunah pawh tanpuina dawng chhunzawm zel thei turin an dil bawk tih hriat a ni a.
Paletwa township chhungah kum 2018 kum tawp lam leh 2019 kum tir lam khan Arakan Army (AA) leh military council sipaite nasa takin an inkap a, tualchhung mipui sing chuang chu Paletwa khua, Sami-ah an raltlan a.
Paletwa khaw chhungah raltlan camp 5 awmin, chhungkua 1200 chuang, mi 6000 vel an awm mek tih hriat a ni.
