Thuneihna latu military council hnuaia Myanmar Police Department-a thawk police force te a ni tela an kiam zel avang leh mi thar lak luh tur mamawhna a san em avangin, Police head office hnuaia awm security lam mawhphurhna la police pawl 6 thiah a nih tur thu sawi rik a awm a.
Myanmar police head department hnuaia Navy security police, Airforce security police, Tourism Security Police, Oil Security police, Forest Security Police leh Highway Police te chu tihtawp emaw thiah tum a nih thu Navy Police force (CDM) zawm police lieutenant Commander pakhatin Irrawaddy news a hrilh a ni.
Chung police force pawl 6 titawp tura thutlukna chu tun hnai, Naypyidaw-a police officer lawk zualte inhmuhkhawmnaah rel thluk tawh a ni a, Home Minister-in a hming a ziah hnan veleh tihtawp hna chu kalpui nghal a ni dawn a.
Kum 2008 dan puiah chuan mipui thlantlin sorkar hnuaiah sipai lamin Ministry 3 chiah direct-in a chelh thei a, Ministry dangah a inrawlh thei lo bawk a. Chuvangin, sipaiin mi thenkhat sorkar inawpna lamah hmun pek a, sawn chhuah tuma police force pawl 6 thiah a tum chu thil tangkai lo leh awmze nei lo, danpui (constitution) ziah belhna mai a nih thu CDM zawm Yangon region, Police Information department lama thawk pakhat chuan a sawi a.
Myanmar police force-ah hian police nuai 1 vel awm tur tih a ni a, thuneihna lak hnuah erawh CDM zawm, kum upat avanga pension, thi leh hrisel lote an tam tak avangin, pawl 6 chu thiah tum a ni a, chutih rualin chung pawla awm police-te chu, chu ruahmanna avangin an beidawng hle tih hriat a ni.
A nihna takah chuan Myanmar police force hi a tir atang rengin, an nih tur zat ni pha lovin, an awm a, sipaiin thuneihna a lak hnuah CDM zawm police 7000 dawn an awm tawh a; mipui kawngzawhte thahrum hmanga an hnawh darh thin avangin, an hming a chhe hle bawk a, mi thar lak luh pawh a harsat phah a; chuvangin, security force hman tlak em em loha ngaih pawl 6 chu thiah a, chunga awmte hmun dangah nihna leh mawhphurhna pek tumin military council chuan hma a la zui ta niin CDM zawm police officer pakhatin a sawi bawk a ni.
