Sipai lam nen sumdawnna (business) lama inzawmna nei social media-a Page, Group leh Account te chu titawp a, hremna pek a nih tan thu Facebook (or) Meta company-in vawiinah thuchhuah a siam a.
Kumin kumtir lamah Facebook chuan sipai thil reng reng advertise a lo khap tawh a, chu mi hnuah human rights bawhchhiatna kal zel leh tharum thawhna kal zel chu sipaite sumdawnna atanga sum lut nen inzawmna a neih thu khawvel ram hrang hrangin an tarlang a, chu mi denchhanin tunah hremna pek a nih thu Meta (facebook) chuan a sawi a ni.
Sipaite bawhchhiatna chi hrang hrang chu civil society leh human rights lam pawlin kimchang takin an record vek a, America, Europe leh ram dang sorkar pawhin hremna leh hrekna an kalpui thu hriat a ni a.
Meta chuan, “Myanmar sipaite sumdawnna leh chu mi kaihhnawih huam chin chu a zau hle a, englai pawha dik taka ramri chin khamsak chu thil harsa tak a ni a. Chuvangin, sipaite sumdawnna kalpui UN hnuaia Myanmar chanchin (fact finding) mission-in kum 2019-a a report theh luh rinchhan leh UN business leh human rights guideline nena inmilin tunah hremna kawng dap zel a ni,” tiin a sawi belh a.
Chu bakah chuan Meta chuan Myanmar dinhmun chu zirchian zel a ni dawn a, mipuite an him zawk theih nana thil tih ngaite chu tih chhunzawm zel ani ang tiin a sawi bawk a ni.
