Arakan Army (AA) army chief General Thun Myat Naing (ထွန်းမြတ်နိုင်) chuan mi a rawn tibuai reng a nih chuan, inremna dah thain, military council Northern Command Headquarters (NCH) Commander General Thin Lat Oo (ထင်လတ်ဦး) chu a awmna hmun thlenga beih a nih tur thu, a Twitter kaltlangin warning a pe a.
General Thun Myat Naing chuan, “Ko Thin Lat Oo, ti kual vel suh, i ngaimawh awm tawh riau mai. Inremna tih ang vel hi ka ngaipawimawh dawn lo. I awmna hmun thleng rawkin kan rawn khawrh chhuak dawn che a nia aw,” tiin a May ni 6-a Twitter-ah a ziak a ni.
Tunah hian Northern Command Headquarters awmna Arakan state-ah AA nen sipai lama an inep hle rualin administration lamah pawh an intai deuh reng a. Chutih laiin military council sipai lamin April thla tawp lam atangin, Arakan hmar lam khaw thenkhat an check bakah, Irrawaddy region, Hai Gyi thliarkar bula awm, Arakan mite chu AA nena inzawmna nei tia puhin an man bawk a ni.
May ni 5-a, Naypyidaw meeting-ah military council Chairman “April ni 22-ah remna dawhkan kil pui turin kan sawm tawh a. Hruaitute ngei, pawl hruaitute chu keimahin ka hmu ang. An duh dan leh an mamawh chu ka theih ang tawkin kan lo tihsak ang. Lehlam pang atang chauha tih bur theih a ni lo. Pawl inkarah sawihoa sawifel tur a ni,” tiin a lo sawi tawh a.
Sipaihotu Min Aung Hlai chuan ethnic armed group pawl hrang hrangte chu amah ngeiin hmua remna kawng zawn pui tumin, May ni 9 ral hmaa sawmna chhang let turin nawr mah se, EAO (Ethnic Armed Organization) lian tak takten an hmuh dawn loh thu hriat a ni.
