Sagaing region, Sagaing township, InnSa khua Military council sipai ten luh chilha chenna in an halnaah Military council sipai 3 an thi a, chenna in 370 chuang an hal chhiat thu People’s Army to Fight Dictatorship- PAFD pawl zinga thuneitu pakhat chuan Yangon Khit Thit Media a hrilh a.
April 21 zing dar 10:00 vel khan MinMu township-a Military council sipai 100 rual operation ten MuMyit tuipui an kai hnuah Sagaing township InnSa khuaah lutin chenna in an hal nual a, mipuite chhanchhuak tura PDF ten an hmalaknaah Military council sipai 3 an thi a, mi 3 an hliam thu hriat a ni a.
“April 19 khan MinMu towmship an luh chilh tawh hnuah MuMyit tuipui an kana April 20-ah InnSa khua an luh leh hnuah In an hal a. Hetia In an hal lai hian tualchhung mipui veng himtu pawl ten tualchher silai leh 60 MM-in kan lo hmachhawn a. Military council sipai 100 rual ten hmanraw lianin min beia keinin tualchher silaiin kan bei thung” tiin People’s Army to Fight Dictatorship- PAFD pawla thuneitu pakhat chuan Yangon Khit Thit Media hnenah a sawi a ni.
He inbeihnaah hian People’s Army to Fight Dictatorship- PAFD, company DK PDF-MMU, Phoneex SGG, PDF tangrual pawl ten an bei a. Tunah hian Military council sipai ten Sagaing township, Taungkya (Tong Chia) khua ni tlakna lam MuTa khuaah buk an la khuar mek thu hriat a ni bawk.
Military council sipai ten an beihna avangin InnSa khuaa Monastery telin chenna in 370 chuang an hal thu Linn Yong Net SSG te hnen atanga hriat a ni a.
“Military council sipaite an luh rualin tualchhung mipuite an tlanchhe vek a, thi leh hliam an awm lo niin kan hria. Khawchhung an hal vek a, Bawng a thi nual a, Motor, Bike leh Leilet hmarua te pawh a kang ral vek. Mipui thenkhat te ramhnuaiah an awm nual a, a then khawchhung an lut zawk a, chen theihna hmun a awm chuang lo” tiin Lin Yong Net SSG pawla thuneitu pakhat chuan Yangon Khit Thit Media hnenah a sawi a ni.
Military council sipai ten an hal chhiat tak in neitu chhung te tanpui an ngai hle a, a thei apiang ten tanpui zel turin an sawm thu, thuchhuah an siam hial a ni.
