Military council sipai ten Matupi khawpuia Kala khawpum deuhthaw an hal

0

Chin State, Matupi township Matupi leh Paletwa kawnga awm, In 30 vel awmna Kala khua Military council sipai ten an halchhiat thu hriat a ni a.

Matupi khua atanga Paletwa khaw lama ration phur Military council sipai ten March 31 khan Kala khuaa chenna in 9 an hal tan a. April 1-ah In 21 hal nawn lehin In 30 an hal chhiat vek thu Matupi township, PDF ten an thuchhuahah an tarlang a ni.

“Kala khuaa a inkahnaah Military council sipai ration phur Motor pakhat a chhia a, khawchhung an luh hnuin In an hal a. March 31 khan an Khaw chuanhnuai an hal a, chuanchungah an riak thung a. April 1-ah an chhuahsan dawnah chuanchung lam In 21 an hal hnuah Wa Tan Te khaw lam an pan” tiin Matupi township, news and information-a thuneitu Salai Pa Thawng chuan a sawi.

Heng bakah hian April 3 pawh khan Military council sipai ten Wa Tan Te khuaa chenna in an hal chhunzawm leh a, an hal chhiat dan kimchang hriat chian a nih rih loh thu a sawi zui bawk.

Kala khua hi Matupi khua atangin mel 24 vela hlaa awm a ni a, In 45 nufa awmna khua niin Military council sipai ten an halchhiat avangin In 15 chauh a bang tawh a ni.

Matupi township-ah March 20 atang khan Military council sipaite leh PDF te an inkap chhunzawm zel a, Military council sipai thi leh hliam an awm nual thu hriat a ni a. Tun dinhmunah hian Matupi leh Paletwa inkar kawnga Kala khua leh Wa Tan Te khuaa tualchhung mipui te ramhnuaiah an tlanchhiat vek thu hriat a ni bawk.

Share.

Leave A Reply

Exit mobile version