Military council sipai ten ni 19 chhungin SweKu Khuaah chenna in 1000 vel an hal

0

Kachin State, SweKu (Sui Ku) township chhuah lamah March 23 atang khan ni 19 chhungin Military council sipai ten operation an neih avangin chenna in 1000 vel an hal chhiat thu SweKu PDF ten April 15 khan an thuchhuahah an tarlang a ni.

SweKu township-a khaw 12-ah chenna in 956 an halchhia niin an sawi a. Military council Division 88 hnuaia Khah Lah Yah (IB) 10, IB 77, IB 88 ten March 23 atangin April 9 thleng, ni 19 chhung an bei a, chung lam Thlawhna atangin vawi 15 aia tlem lo an bomb thu SweKu PDF zinga thuneitu pakhat chuan a sawi a ni.

SweKu township ManNa khuaa tualchhung mi pakhat chuan Khawchhung an hal a, tualchhung mipui te an tlanchhe vek tiin RFA Media a hrilh a.

“Khaw 12 an hal mek a, Thlawhnain a bomb avanga alh leh an hal avanga alh te a ni hlawm a. Tualchhung mipuite an tlanchhe nual a. Tunah Military council sipaiten an chhuahsan tawh a, kan la haw ngam rih lo” tiin a sawi a.

 Military council thupuangtu General Zaw Min Tun chuan kan sipaite hian engtikah mah In an hal ngai lo tiin RFA Media ten an zawhnaah a lo sawi tawh a ni.

April 9 khan SweKu khawpui SiTa khuaa raltlan zinga mi 11 Military council sipai ten an man hnuah an kah hlum thu tualchhung mi ten an sawi a.

Military council te chuan April 9-a an thuchhuahah chuan March 23 atangin April 8 thleng khan SweKu township-ah vawi 21 inkahna a chhuah thu an tarlang a. Heng bakah hian KIA leh PDF ten he hmunah buk an khuar a, Sagaing region-ah ralthuam leh a khaihnawih tam tak an pek bakah Thingluang an tawlh ru thin tiin an tarlang bawk a ni.

Data for Myanmar ten kum 2023 February 10-a an thuchhuahah chuan Military council ten thuneihna an lak hnu kum 2023 January 31 thleng khan Military council te leh an hnuaia mi ten ram pumah chenna in 55484 an hal chhiat tawh thu an tarlang bawk a ni.

Share.

Leave A Reply

Exit mobile version