Sagaing region, Tataing khuaah March 2 khan Military council sipai ten tualchhung mi 17 an thah bakah hmeichhe mi 3 an pawngsual hnuah an thah thu hriat a ni a.
Tualchhung mi 17 a huhova an thahtu Military council sipai Division 99 ten Tataing khua an luhchilh hma, February 26 khan Sagaing region, Kandaw khua inkahnaah PDF hliamte an sawisa hlum bawk a ni.
Heng bakah hian Tataing khuaa Ko Mynit chuan “Tualchhung mipui 70 chuang an man a, an sawisak hnuah an chhuah leh a, an hlauthawng hle a ni” tiin a sawi a. A man te zingah March 2, chawhnu dar 12:00 khan Ngyang Yan Kyun khua fu huanah ruang 9 lai an hmuh thu hmutu ten an sawi a ni.
“Kan hmuh chinah hengtianga mihring an sawisak hnuah an thah kan la hmu ngai lo. Heng avang hian tualchhung mipui te khawchhungah an haw ngam lova, hlau leh khurin an awm mek a ni” tiin Tataing tualchhung mi pakhat chuan a sawi a ni.
