Magway (Ma Gui) leh Chin State, inkal pawhna KyaukThu leh Mindat kawngah eng lai pawha inkah theihna dinhmun a awm theih avangin July 9 atang khan tiam chin awm lova kawng khar a nih thu CDF-Mindat thupuangtu Salai Ha Om chuan heti hian a sawi.
“A chhan chu Military council sipaite hi KyaukThu khua atangin Mindat khaw lamah rawn kal thei an ni a, mipui te kan him zawk nan tiin kawng kan khar rih a, an rawn kal chuan kan inbei nasa mai thei a ni” tiin a sawi a.
Chuvangin Magway region, Shaw leh KyaukThu khuaa Gangaw District No.13 Battalion-ten Shaw leh KyaukThu kawngah mi tu mah veivak lo turin July 9 khan thuchhuah an siam bawk a ni.
Military council sipai ration phur-ten KyaukThu northen-te an rawn thleng tan tawh a, Shaw khaw lamah an tin zawn nia hriat a ni bawk a.
July 8 khan Military council sipaiten Mindat township, WanKhon khua an bomb-naah tualchhung mi 3 an boral a, chenna in 10 an hal thu hriat a ni a. He inbeihna avangin KyuakThu township, MyoPauk khaw chhehvelah an rawn beih theih thu CDF-Mindat thuneituten an sawi a ni.
June 26 pawh khan Military council sipai leh CDF-Mindat te inbeihnaah Military council sipai 10 aia tlem lo an thi a, ni khat thil thu-ah Jet Fighter pahnihin vawi 7 an bomb thu hriat a ni bawk.
Mindat khuaah hian an la inbei chhunzawm zel a, thi leh hliam chiang taka hriat theih a la ni rih lo a ni.
