Chin State, Mindat township, WanKone khua Military council sipaiten Thlawhna hmanga an bomb hnuah ralthuam lian leh tea an kah avangin naupang pakhat leh nau pawm lai telin tualchhung mi 3 an boral a, mi pakhat a hliam nat thu hriat a ni a.
“Military council sipaiten pawi sawi lo mipui awm mai mai Thlawhnain an bomb nasa hle a, vawi 3 an hel kual hnuah inkah buaina eng mah awm hran lovin an ringawt” tiin Mindat khuaa tualchhung mi pakhat chuan a sawi a.
July 8, zing dat 11 vel khan Mindat township, MaSheinHlaw village tract, WanKhone khuaa tualchhung mipui te awmna leh raltlante awmna hmunah Military council sipaiten Jet Fighter-in pound 500, bomb 2 leh bomb phir 4, rocket hmangin an bomb thu hriat a ni a.
Hetiang vek hian Mindat khuaa Khah Lah Yah (IB) Battalion-ten WanKone khua chu ralthuam lianin vawi 4 zet an tawngpawng bomb thu Mindat-CDF-ten July 8 khan an thuchhuahah an tar lang bawk a.
Military council sipaiten ralthuam lian leh te an hman avangin kum 9 mi hmeichhe naupang 1, kum 30 mi nau pawm lai nutling 1 leh kum 65 mi nutling pakhat an vaiin mi 3 an boral a, kum 45 mi, mipa pakhat na taka a hliam thu hriat a ni bawk.
Thlawhna khalhtu hming hi chhui mek a ni a, hmuh a nih chuan na tawka a chung thu rel a nih dawn thu Mindat CDF-ten an thuchhuahah an tar lang a.
Military council-ten thuneihna an lak atanga kumin 2023 April thleng khan Chin State-ah Military council sipaiten chung lam Thlawhna atangin vawi 77 aia tlem lo an bomb tawh a, Chin mi 64 an boral tawh a, heng zinga mi 10 te hi CDF sipaite an ni a, mi dang mi 54 te erawh tualchhung mipui te an nih thu ICA-ten an thuchhuahah an tar lang a ni.
