Sagaiang region, Indaw khua tlak lam InPin khua leh NanTa khua inkal pawhna Lei awmna chho-ah Military council sipaiten buk an la khuar avanga Khaw 5-a tualchhung mipui 7000 chuang te an tlanchhiat tawhna hi thla 2 lai a ni tawh a, an chenna khuaah an la haw kir ngam loh thu tualchhung miten an sawi a ni.
InPin khua Lei awmna chhova Military council sipaite leh PDF-te hi inkap thei dinhmuna an awm reng avangin a chhehvel khaw 5-a tualchhung mipui 7000 chuang April thla tir khan an tlanchhiat tawh thu tualchhung miten an sawi a.
Heng tualchhung mipui 7000 chuang tlanchhiate hi a khaw thenawm, an chhungte leh thian te bakah Indaw khuaa PDF te leh tlawmngai pawl hrang hrangten an chhawmdawl mek thu Indaw Revolution-IR pawla thuneitu pakhat chuan RFA Media a hrilh a.
“Keini chuan tlawmngai pawl hrang hrangte hnen atangin vehbur kan khawn a, kan theih ang tawkin an chhawmdawl mek a ni” tiin a sawi a.
AungKone khua leh NanTa khuaah Military council sipaite leh PDF-te an inkah avangin Military council sipaiten tualchhung mi an man nual bakah chenna in an hal nual a, thlai seng lai ni mah se, khawchhung mite an la haw ngam rih lo a ni.
Military council sipaiten khawchhunga in haw duh chuan HmatPungTin (ID) nen in hriattir tur a ni an tih avangin tu mah an la haw ngam rih lo a ni.
He buaina chungchangah hian Sagaing region Military council thupuangtu Immigration Minister U Aye Hlaing, RFA Media-ten phone-a vawi tam tak an zawhnaah chhanna a la awm rih lo a ni.
Myanmar Military council sipaiten ralthuam an chelek avangin mipui maktaduai 1.8 chuang an tlanchhiat tawh thu UN OCHA-ten May 6 khan an thuchhuahah an tar lang a ni.
