July thla chhung khan Military council sipaiten Chin State, Halkha khawpuia mipui chenna in 9, an kalhsak thu Chin hunman right (CHRO) pawlten an sawi a.
Halkha khawpuia, Halkha Veng thar Ward-ah, revolution pawl te nen inhnamhnawih tia an rin te chenna in chu Military council sipaiten Myanmar ram leilung ta tiin hnehchhuhin an kalhsak thu hriat a ni a.
“A nihna dik takah chuan Military council-ten thuneihna an lak avangin anmahni duh thlannain ram zalen an sual a, CDM lut te pawh an mimal duhthlanna a ni a, an chhung te nen inkungkaihna an nei lo hrim hrim a, heti hian an chhung te chenna in thlengin kut an thlak chu a nia” tiin Chin human right pawl zinga hruaitu Salai Mang Hre Lian chuan a sawi a ni.
Military council sipaite chuan he chenna in 9-ah hian, min beitu pakhat an bihruktir bakah an awmtir nia sawiin ram tibuaitu case section 52 angin in neitute hremna leh section 56 hmanga an chenna in chu ram neitu ta angin an chhuhsak dawn thu an tar lang a ni.
Military council sipaiten Halkha khawpuiah ven himna an duty uluk hle a. Military council-ten kum 2021 atanga thuneihna an lak hnu hian Chin State khawpui Halkha-ah Military council sipaiten chenna in 20 vel an kalhsak tawh a, heng zinga chenna in pakhat chu an neitu hnenah an pek kir leh thu Chin human right pawlten an sawi a ni.
