Chin State, Halkha khua, Agape Clinic-a hnathawk mek Doctor pakhat leh Nurse 4 te, Military council sipaiten an man chu June 7, tlai lam khan an chhuah zalen thu an chhung hnaivai te hnen atanga hriat a ni a.
Military council sipaite hian May 21 zan lai khan Halkha Bazar hlui Ward, Agape Clinic-ah luh chilhin Doctor Sicilia, Nurse Henny, Sianlun, Hniang Sung leh J Mawi te chu an man a.
Military council sipaiten an man 5 zingah Doctor Sicilia chu dan anga lak a nih loh avangin ni 3 niah an chhuah leh a, Nurse 4 te erawh chu June 7 tlai lam khan an chhuah leh thu hriat a ni bawk.
Heng an man mi 5 te hi Halkha khawpui Jail-ah an khung mek thu an chhung hnaivai mi pakhat chuan heti hian a sawi a.
“Jail-ah an khung chuan harsatna an nei ngei ang, an sawisa lo niin kan hria a. Doctor erawh chu a zir zawh khan Doctor nihna lehkha a neih loh avangin an chhuah a, Nurse te erawh chu CDM nia ngaiin an zawh fiah hnuah an chhuah leh thu hriat a ni” tiin a sawi zui a.
April 2 pawh khan Military council sipaiten Agape Clinic-a hnathawk Doctor 2 leh mi 3-te, an chenna inah luh chilhin an man tawh a. April thla laihawl velah PDF-ten an man Military council sipai officer te nen inthlengin an chhuah thu hriat a ni a.
Halkha khuaa Agape Clinic hi tualchhung mipuite sum hmanga din a ni a. Military council sipaiten an luh chilh a, hnathawktute an man avangin June 1 atang khan damlo enkawl an chawlhsan thu Halkha tualchhung mipuite hnen atanga hriat a ni bawk.
Agape Clinic hi Military council-ten thuneihna an lak hnu hian damlo pantu an tam thin hle a. damlo enna chi hrang hrang, inzai, nau neih leh thil dang thlengin mawhphurhna an la thei thin a. Military council sipaiten hnathawktu Doctor leh Nurse te an man thin avangin damlo pangngai chauh an enkawl tawh thu hriat a ni.
