Pauh township, Inngedaung khuaa hmeichhia kum 42 mi Ma Aye Aye Win chu sipaiten pawngsualin an that a, kum 3 mi a fanu Ma Ya Ti Moe pawh chema vit hlum a nih rualin, sipaiten PDF mi 5 hal hlumin naupang 9 telin mi 29 chu mihring phawr ralhmatawnga an hruai thu hriat a ni.
Magwei region Pauh township, Inngedaun khuaa hmeichhia kum 42 mi, Ma Aye Aye Win chu military council sipaiten pawngsualin an that a, a bula awm te a fanu kum 3 mi lek Ma Ya Ti Moe pawh chemin an vit hlum bawk niin tualchhung miten Khit Thit media an hrilh a.
March ni 5, tlai lam khan military council sipaiten Inngedaun khua chu silai lian leh te hmangin an tawng pawng kah hnuah an luhchilh a, tualchhung mi tam tak an tlan chhiah laiin, a fanu nena tlan chhiat tum mek Ma Aye Aye Win chu military council sipaiten an man a, an inkawta thutnaah pawngsual rawnin an that zui ta tih hriat a ni.
Khaw chhung mi pakhat chuan, “Khaw chhung mite an tlan chhiat laiin, ani chu hmeichhe naupang kaiin, a tlan hlei thei lova, an man ta a ni. Chu mi hnuah an in kawta thutnaah an pawngsual rawn a, an that zui nghal a, a fanu pawh a awm veil amah chemin an vit a, an tihlum nghal bawk a ni,” tiin a sawi.
Inngedaun khua chu Phyusawthi leh military council sipai force 70 chuangin an luhchilh a, tualchhung mipui venghimtu pawlin bomb hmangin an lo beih ve bawk avangin, an inkap a. Chu inkahnaah sipai 20 vel an thih rualin 20 chuang an hliam a, tualchhung PDF lamah pawh mi 5 an thih thu hriat a ni.
Tualchhung mi pakhat chuan, “Sipai uicho ho lamah mi 20 vel an thi a. An ruangte chu an check vum thur a. Puithiam in lamah pawh an inenkawl a. PDF mi 5 chu man tawkin, sipaiin an hal hlum a ni,” tiin a sawi.
Chubakah military council sipaiten an tawlhsawn rualin naupang 9, hmeichhia 12 leh mipa 8 manin an hruai chhuak a, chung an man zinga pawngsual leh tihhlum tawk chu Ma Aye Aye Win leh a fanu kum 11 te an nih thu hriat a ni.
