Military council sipaiten Khin U leh Kanbalu khua an luh chilh avangin tualchhung mi 5000 chuang an tlanchhia

0

Sagaing region, Khin U leh Kanbalu township ramri khaw chhehvelah April 30 tuk khan Military council sipai 100 velten luh chilhin khawchhung an hal hnuah then fai hna an thawh avangin khaw 6 chuanga tualchhung mipui 5000 chuang in leh lo an tlansan thu hriat a ni a.

Heng raltlan mi 5000 te hian ei leh in, silh leh fen bakah awm hulna leh damdawi an mamawh hle thu TauhKan khuaa tualchhung mi pakhat chuan RFA Media a hrilh a.

“Khawchhunga awm zawng zawng an tlan chhuak vek a; an harsatna ber chu Ni a sain khua a lum bawk si a, chenna tur daihhlim an nei lova, ei in tur an harsa hle a. Tui thianghlim in tur te, damdawi leh hriselna atana mawimawh chi hrang hrang bakah Clinic-te an mamawh hle a ni” tiin a sawi a.

PaZinGyi khua atanga chhuak Military council sipaiten April 30 zing dar 7:00 vel khan TauhKan leh a khaw thenawm Khin U ramri In 700 chuang awmna Ale Sho khua chatve, In 300 chuang an hal chhiat thu an sawi a.

Heng khuate Military council sipaiten an beihna chungchangah Sagaing region, Military council thupuangtu RFA Media ten Phone-a an zawhnaah chhanna a awm rih loh a ni.

April 19 pawh khan Khin U khawpuiah Military council sipaiten an luh chilh avangin khaw 21-ah tualchhung mi sing hnih (20000) chuang in leh lo an tlansan tawh bawk a.

ISP Myanmar ten April 28-a an thuchhuah danah chuan kumin 2023 February 1 atanga April 20 chhung khan Military council sipaiten Martial Law an puanna hmun Khin U township-ah raltlan mi 121300 aia tlem lo an awm thu an tar lang a ni.

UNOCHA ten April 5 thlenga an chhinchhiah dan chuan Myanmar ramah ralthuam vanga in leh lo tlansan mi maktaduai 1.8 an chuan tawh thu an tar lang bawk a ni.

Share.

Leave A Reply

Exit mobile version