Karen National Union (KNU)-te thununna huam chhung NyaungLayPin District Bridage 3 bial-ah Military council sipaiten July chawhma deuh atang khan an luhchilh thu KNU-ten an sawi a.
Military council Khah Lah Yah (IB) 20 leh IB 264-ten an beih rawn thu KNU thupuangtu Pado Saw Ka Klee Sae chuan a sawi a, Bridage 3 bial chhungah inkahna hi a la nasa mai thei a ni tiin a sawi a.
“An ruahman dan kan hre chiang lova, an thil tih dan kan en hian inkahna nasa tak an la chhuak mai thei a ni tih hi kan rin dan a ni” tiin a sawi bawk a ni.
July 1-14, chhung Military council sipaite nen kan beihnaah khaw 17-a tualchhung mi 14117, in leh lo an tlansan thu July 15 khan KNU-ten thu an chhuah a ni.
Military council-ten thuneihna an lak hnu hian KNU huam chhungah in leh lo tlansan mi nuai 6 an awm tawh thu KNU tlawmngai pawlten an sawi a.
KNU te hian Kayin State, Mon State, Bago region leh Taninthari region leh Thai Myanmar ramri thenkhat hmun 7-a thenin an thunun a. Ramchhung inkahhai thuthlung (NCA) ziak mah se, Military council-ten thuneihna an lak, kum 2 chhung hian KNU huam chhungah inkahna vawi sing chuang a thlen tawh thu hriat a ni a.
UN OCHA-ten June 13 thlenga an chhinchhiah dan chuan Myanmar-a Military council-ten thuneihna an lak hnu hian mi maktaduai 1.5 in leh lo an tlanchhiatsan a, chhawmdawl an ngaih thu an tar lang a ni.
