Myamar ramah dik lo taka thuneihna pawng lak a nih atanga kum khat chhungin military council sipaiho kah hlum vanga pawisawi lo civil mi thite chu mi 1937 awmin, man tawk 14100 an awm thu Assistance Association for Political Prisoners (AAPP) pawl chuan thuchhuah an siam a ni.
He chhinchhiahna hi nikum 2021 February ni 1 atanga kumin June ni 13 thlenga AAPP record lakkhawm a ni a, a takah chuan chu ai pawha thi an tam zawk a rinawm thu tarlan tel a ni a.
Spring Revolution chhungin vawiin thlenga man tawk zat chu mi 11043 niin, chung zinga mi 1132 chu jail tantir an ni tawh a. Jail tang zingah kum 18 hnuai lam 2 telin mi 73 chu thi tura an chung thu rel a ni.
Arrest warrant chhuah avanga biru mi 1979 awmin, tih hlum tawk 41 telin mi 120 chu tihhlum tawh anga an chungthu rel tawh a nih laiin, tih hlum tura tih chu mi 114 thleng an awm tawh a ni a. Tun hnaiah intiamkamna emaw Bel-a chhuah mi 21 awmin, chutianga chhuak zawng zawng chu 3036 an ni.
Chu bakah thuneihna lak a nih atanga kumin 2022 May thla tawp thlenga military council sipaiten dik lo taka in an kalhsak tawh zat chu 617 chuang a nih thu thu AAPP chuan a tarlang bawk a.
June ni 10 zan dar 7 velah Sagaing region, Kalaymyo atanga mahni in lama haw Chin mi Pu Hrangnem chu Tamu khaw chhung, sipai awmna hmun bula kah hlum a nih thu hriat a ni a.
June ni 10 tho, zan dar 9 velah Kaya state, Demosoe township, Saungdula khuaah Nguitaung based IB 102-a sipaite laipui kah puah avangin, mahni in chhunga awm U Kori chu kah fuh niin, a thi a, a rualin kum 5 leh mi dang pahnih pawh an hliam thu hriat a ni.
Chutianga tualchhung, khaw chhung leh hmun hrang hranga pawl hruaitu, activist te, chanchinbu mite, CDM-a tel te leh pawl hrang hranga mite man, hren leh thubuai siamsak tawkte bakah Revolution chhunga nunna chante chanchin thar hriat nei chuan AAPP a hrilh hriat zel theih a ni.
