Sagaing region, Kalaymyo chhim lam East Santa khua chu June 21 zan khan inkah buaina awm lovin Military council sipaiten ralthuam liana an kah chhuahnaah kum 5 mi naupang pakhat a boral a, a chhung te mi 3 an hliam thu hriat a ni a.
June 21, zan dar 10:20 vel khan Military council sipaiten ralthuam lian an kah chhuah avangin East SanTa khuaa chenna in pakhatah bomb a tla a, an mut laia bomb tla a nih avangin an naupang ber kum 5 mi a boral nghal a, a chhung te an hliam thu hriat a ni a.
“An chhungkaw mut laiin bomb a tla a, in neitu nu ber a kup hmawr atangin an tansak a, an fa pakhat a lu-ah na takin a hliam a, an fa dang kum 12 pawh na vak lo a hliam bawk a, an fa naupang ber erawh a lu hlohin a boral zui nghal a ni” tiin a sawi a.
Hemi tuk vek hian Military council sipaiten ralthuam lian an kah chhuah avangin Kalaymyo chhim lam, TaSi khuaa kum 23 mi bomb per avangin an boral bawk a ni.
Hetiang vek hian Kalaymyo chhim lamah Military council sipaiten ralthuam lian an kah chhuah thin avangin June thla chhung khan tualchhung mi 5 an boral tawh a, mi 20 chuang an hliam tawh thu tualchhung miten an sawi a ni.
Hemi ni June 21, zing dar 9:30 vel khan Kalaymyo atanga tlak lam, TaungPhiLa Ward No.14 School chhehvelah bomb kam awm nia hriain Duty-ten ralthuam lian leh te vawi 30 aia tlem lo an kah chhuah thu hriat a ni bawk.
Heng bakah hian Military council sipaiten Kalaymyo khawpui chhung hmun hrang hrangah duty-in mipui veivak thenkhat te an check nasat thu hriat a ni bawk.
