Sagaing region, SaLinGyi township, Chindwin tuipui tluan chu July 29 atang khan Military council sipaiten Lawng 7 hmanga an kahna avangin tualchhung mi 8000 chuang an inthiar fihlim thu tualchhung mi te hnen atanga hriat a ni a.
July 29 zing dar 8 atang khan Military council sipai Lawng hmangin ralthuam lian an kap chhuak a, tlai lam khan SweKone khuaa tualchhung mi 2 telin PDF 3 te an hliam thu hriat a ni a.
Military council sipaiten ralthuam lian an kah chhuah avangin khaw 11-a tualchhung mi 8000 chuang an tlanchhuah thu hriat a ni bawk.
Raltlan zinga mi pakhat chuan “Tuipui atangin Lawng 7 hmangin SaLinGyi khua an lut a, ralthuam lianin an bomb nghal a, SweKone leh YwaChauk khuaa tualchhung mi 5000 chuang an tlanchhe hlawm a. Chenna in a chhe nual bawk a, thenkhat chu an rawn haw leh hlawm tawh, a tam zawk chu an raltlan mek” tiin a sawi a.
July 31-ah chuan Military council sipai Lawng 7 te chu Chindwin Lei awmna chhoa TanBu, SiTu, KyuakHmaw khaw bulah an chawlh avangin tualchhung mi 3000 vel an tlanchhiat thu tualchhung miten an sawi a.
Hetia Military council sipaiten an bomb chungchangah Sagaing region, Military council thupuangtu Social Affairs Minister U Saw Naing chu July 31 khan RFA Media-ten phone hmanga an zawhnaah chhanna a awm lo a ni.
UNOCHA-te kumin 2023 July 15-a an thuchhuah danah chuan Military council sipaiten thuneihna an lak hnu hian Sagaing region-ah tualchhung mi nuai 8 vel (778900) in leh lo an tlansan tawh thu an tar lang a ni.
