Sagaing region, Swebo township ni tlakna lam khuaah April 26 zan dar11:00 vel atang khan Military council sipaiten an luh chilh avangin tualchhung mipui 3000 chuang in leh lo an tlansan thu raltlan tanpuitu zinga thuneitu pakhat chuan a sawi a.
Military council sipai 100 rualten April 26 zan atang khan ralthuam lian leh te an kap nasa hle a, khaw 6 chuanga tualchhung mipui 3000 chuang an tlanchhiat thu Swebo khawpui BoTe khuaa awm hming thup pakhat chuan RFA Media hnenah a hrilh a.
“April 26 zan dar 11:00 vel khan Military council sipaiten BoTe khua an luh chilh avangin tualchhung mipuite an tlan chhuak deuh vek a. Hriat sa a nih loh avangin thawmhnaw pahnih khat bak kan la hman lo, tunah pawh kan khaw thenawmah an la awm mek” tiin a sawi a.
BoTe khuaah hian In 200 chuang leh mihring 400 chuang vel an awm a, Lo neia ei zawng an ni deuh ber a. Military council sipaiten an luh chilh avangin ramhnuaiah an tlanchhiat nual thu tualchhung mite hnen atanga hriat a ni.
Military council sipaiten ten an beihna chungchangah Sagaing region Immigration Social Affairs Minister U Aye Hlaing, RFA Media-in phone-a a zawhnaah chhanna a awm rih lo a ni.
Tualchhung raltlante tanpuitu zinga Ko ZarNi chuan tui thianghlim leh damdawi an mamawh thu a sawi a.
“Military council sipaite awm dan a hriat theih loh, chhun lama tlan chhuak an awm leh thin a. Tunlaiah Ni a sat avangin tui thianghlim in tur an mamawh zual a, kum upate an chau zual a, a bik takin damdawi an mamawh zual hle a ni”
Raltlan tam zawkte hi naupang, kum upa leh raipuar an thahnem hle avangin hriselna lamah hmanrua leh damdawi an mamawh zual hle thu an sawi a.
April 19-a UNOCHA ten an thuchhuah danah chuan Myanmar-ah ralthuam hmanga an beih avangin mi 180000 chuang in leh lo an chhuahsan tawh thu an tar lang a ni.
