Mandalay region, ThaBeihKyin township, SeZinKone khuaa tualchhung mi 80 chuang chu Military council sipaiten an man avangin khaw 2-a tualchhung mi 2000 vel te an inthiar fihlim thu tualchhung miten an sawi a.
July 26 atang khan SeZinKone khua chu Military council sipai 100 chuangten an luhchilh a, tlan chhuak ve thei lo hmeichhia, naupang leh kum upa te chu manin July 28 khan khawchhung Buddhist biak in velah an khung khawm a, phone te an laksak nual thu an sawi a.
Heng bakah hian SeZinKone khua leh a khaw bul Letpankone khuaa tualchhung mi 2000 vel te chu an inthiar fihlim thu tualchhung mi pakhat chuan a sawi a ni.
SeZinKone khuaah hian In 400 vel an awm a, Letpankone khuaah hian In 300 vel an awm thu hriat a ni a. July 28 tlai thleng khan Military council sipaiten SeZinKone khuaah buk an la khuar chhunzawm thu hriat bawk a ni.
UNOCHA-ten July 15-a an thuchhuah danah chuan Military council-ten thuneihna an lak hnu atang khan in leh lo tlanchhiatsan mi maktaduai 1.6 vel an awm tawh niin an tar lang bawk a ni.
