Sagaing region, WatLet township, PhaYaPyan khuaah June 18 khan Military council sipai 100 rualten chenna in 180 vel an hal thu tualchhung miten an sawi a.
Heng Military sipaite hian June 17 khan PhayaPyan khuaah an riak a, a tuk zing an chhuah rualin chenna in an hal thu security zinga hming thup pakhat chuan RFA Media a hrilh a.
“June 18 tuk khan In an hal tan a, In 180 vel a ni ang, kan la endik mek a, In tlemte chauh a bang tawh” tiin a sawi a.
Heng Military council sipaite hi PhaYaPyan khua an hal hnuah WatLet township ni tlakna lam Sagaing township an chhuahsan thu tualchhung miten an sawi a.
June 19 khan In 250 awmna PhaYaPyan khua leh a chhehvel khua tlanchhia te an haw kir leh thu hriat a ni a.
He thil thleng chungchangah Sagaing region Military council thupuangtu RFA Media-in phone hmanga a zawhnaah chhanna a awm rih lo a ni.
Kum 2022 June 6 khan RFA Media-ten Military council thupuangtu Major General Zaw Min Tun an zawhnaah khan tualchhung mipuite chenna In reng reng eng tikah mah kan hal ngai lo tiin a lo chhang tawh a ni.
Data for Myanmar-ten kumin 2023 June 14 thlenga an chhinchhiah dan chuan Military council sipaiten thuneihna an lak, kum 2 chuangah hian Military council sipaiten Sagaing region-ah chenna in 53816 an hal chhe tawh tiin an tar lang a ni.
