Chin State, Kanpalet township-ah Military council-te nena ralthuam chungchanga inhnamhnawih nia rin leh Public Administration lam tibuai thin Non-CDM mi 300 chuang te chu black list-ah an puan thu Kanpalet township, Public Administration-ten July 4 khan an thuchhuahah an tar lang a.
“Black list- puan CDM te hi CDF gate-ah pal tlang phal an ni dawn lova, a letin chawitir an ni ang. A chhan chu Kanpalet khuaah hian Military council-te school pakhat mah a awm lo va, Non CDM te tin zawn bik vang pawh a ni lova, tute nge CDM lut a, tute nge Non CDM tih hriat chian kan duh vang a ni” tiin Kanpalet township, Public Administration zinga thuneitu pakhat chuan a sawi a.
July 4-a black list-a an puan zingah hian Kanpalet township Education Department-a hnathawk mi 800 atangin Non-CDM te Military council-te nena ralthuam chungchanga inhnamhnawih mi 322 te an ni tiin an thuchhuahah an tar lang a ni.
Heng black list-a an rinhleh te hi intiamkamna hun hawn a ni a. An rinhleh Non-CDM leh CDM te hian a rukin Military council-te hnenah an zirtir hlawh an la thin a, thenkhat chu a rukin Tuition an hawn thin thu hriat a ni bawk.
Kanpalet township-ah hian Kanpalet khuaa school leh ChinDui khuaa school chauh Military council-ten school an hawng a, a dang zawng khaw 100 chuangah chuan mipuiten school an hawn thung tiin Kanpalet township, Public Administration zinga thuneitu pakhat chuan a sawi a ni.
Kanpalet township-a mipui school-ah hian CDM atanga zirtirtute leh tlawmngai pawlten Hight school thleng an zirtir thin thu hriat a ni a. Heng school-ah hian zirlai mamawh chi hrang hrang an tlakchham bakah zirtirtute pawh an tlem hle thu hriat a ni bawk.
