Military council-te tharumtawhnaah hrem turin Myanmar ram palaiin a ngen

0
Sagaing region-a PinZinGyi khua an beihnaah United Nations Security Council ten zirtawpni khan closed-door meeting an neihnaah UN British Ambassador chuan Military council sipai firfiak ten hetia chhiatna rapthlak tak an thlentir hi an demawm hle a. Myanmar Military council sipai ten hetia mihring a suatna hi criminal case lian tak a ni a, khawvel ram hrang hrang ten na taka action la turin UN Myanmar Ambassador U Kyaw Moe Tun chuan a ngen thu hriat a ni.
 
Sagaing region, KantBaLu towmship, PaZinGyi khuaa Military council sipai ten Thlawhna hmangin an bomb a, tualchhung mi 100 chuang an boral chungchangah zirtawpni khan Security Council chuan closed-door meeting a nei a. He meeting-ah hian Military council ten thuneihna an lak hnua mipui a huhova thih tam ber tum a ni tiin meeting kaihruaitu UN British Ambassador Barbara Woodward chuan na taka a dem thu a sawi a ni.
 
“Myanmar Military council sipai ten hetia mihring pawisawi lo an thah hi pawi an ti lova, an tih ngei a nih thu an sawi bawk a. Mipui awm mai mai ralthuam keng lo an suat hi chu ramhuai hnathawh a ni tiin UN British Ambassador chuan na takin a dem hle a. He hian International dan a pal zut a, a dem hle a, action la thuai turin hma an la mek a rinawm a ni” 
 
He chhiatna chungchanga UN Security Council ten thuchhuah an siam thei lo hi chu pawi ka tiin kan rilru a nuam lo khawp mai. Myanmar chungchang ngaihtuahpui turin Security Council te thawhpui atan sawm vek kan tum ang tiin British Ambassador Barbara Woodward chuan a sawi a. Myanmar Military council ten hetia mipui an rahbehna hi British pawn theihtawpin hma a lak dawn thu a sawi tel bawk a ni.
 
Sagaing region, PinZinGyi khuaa April 11-a Military council sipai ten Jet Fighter-a an bomb-naah tualchhung mipui naupang telin mi 168 zet an boral thu UN Myanmar Ambassador U Kyaw Moe Tun chuan a sawi chhuak a.
 
Kum 2022 December thla khan Security Council ten Myanmar chungchangah thutlukna No. 2669 hmangin an rel tawh a. Mahse, Military council ten ram chhung mipuite hnenah tharumthawhna a la bei chhunzawm zel a. Heng avangin ram hrang hrang ten action na taka la theuh turin U Kyaw Moe Tun chuan a sawi zui bawk a ni.
 
“Myanmar-ah tharumthawhna thawp rawh se tiin UN Security Council chuan thutlukna No.2669-ah an ziah tawh chu an pal zut a. Myanmar ram chhunga in leh lo tlansan raltlante tanpui turin leh mipuite an him theih nan UN Security Council meeting-ah a ngen a ni”.
 
PaZinGyi khuaa Myanmar Military council ten Thlawhna hmangin an beihna chungchangah ASEAN ten an dem nasa hle a, ASEAN-a Chairman inchelh chhawka Chairman chelh mek Indonesia pawhin thuchhuah a siam angin US. Europe, France, Germany, Norway te pawhin thuchhuah an siam nual a, an thuneitute chungah action la ngei ngei turin an ngen bawk a ni.
Share.

Leave A Reply

Exit mobile version