Myanmar ram tana zalenna sualtute zing ami, Military Council ten an tihhlum tak te duh lohna function, India, New Delhi khawpuia neih tumna chu India sorkarin a rem tih loh thu hriat a ni.
Politician lar tak 88 movement, zirlai hruaitu Ko Kyaw Min Yu (Ko Jimmy), MP hlui Ko Phyo Ziiya Taw leh mi dang pahnih U Hlah Myo Aung, U Aung Tuyah Zaw te, Military Council ten an tihhlum chungchangah duh lohna lantir nan tiin, July 30 khan New Delhi-ah Myanmar mi ten Function huaihawt an tum a.
New Delhi khawpuia, Jantarmantar Park kawta huaihawt tum niin, New Delhi Police ten an phal lawk zet a, function hman dawnah cancel a nih leh thut thu New Delhi-a Myanmar hruaitu pakhat chuan a sawi.
“Tun hmaa kan tih thin angin dilna lehkha kan theh lut a, phalna kan hmu bawk a. Hun kan hman dawn ruaiah Police Station atangin an rem tih leh loh thu min rawn phone a. Kawngzawh tur mi 12 te chu Police ten an Office-ah an hruai a, chung lam atanga an phal loh thu an hrilh a. Kawngzawh tihluih an hlauh avangin hun pawh sei nan tiin tlai lam dar 2:30-ah an chhuah chauh a ni” tiin a sawi.
Khawvel Democracy ram lian ber, India ram hi Military Council-te nen an inthian tha hle a, palai chungchangah leh ralthuam chungchangah pawh a tanpuitu ber ram a ni a.
Hetia India sorkarin an phal tak lohah chuan, hmun remchangah huaihawt an tum leh thu hriat a ni.
“Democracy ramah hetia an dan beh avang hian, Human Right dan a kalhah ka ngai. He Jantarmantar hmunah hian function nei dawn ila, Min Aung Hlain-a’n a tihhlum te hi ram hrang hrang bakah, India hian dem vein Min Aung Hlain-a chhungah hian action la ve se tih hi kan duh a ni” tiin New Delhi-a Myanmar hruaitu pakhat chuan a sawi.
India sorkar hian Military Council-te chunga an in tuk luhna hi tidanglamin, Democracy kawng zawhtu te tanpui zawk turin, July 25 khan Myanmar chuan ram hrang hrang pawl 180 chuangah open letter a thawn nual a ni.
