Minaunghlain-a kaihhruai Military Council te hian Myanmar hmunpui thenkhatah China siam, hmel lan theihna Camera an bun nual thu Rauter News-ah an tar lang.
Military Council hian sorkarna an lak hnu hian ngaihtuahna hriat theihna (AI) leh hmel chhinchhiah theihna Camera an bun nual thu hriat a ni a. Myanmar ram chhunga khawpui 4-na Monywa tiamin khawpui lian pangaah an bun thu Rauter News chuan a tar lang.
Heng Camera tha chi te hi ram dang Company lian Fisa Security Company leh Naungyu (Nawng Yu) Technology Company te an ni a. Heng Company te mamawh zawng zawng hi China, Spy Technology Company lian Zhejiang Dahaua Technilogy, Huawei leh Hikvision hnen atanga thawn luh niin an sawi.
Military Council ten sorkarna an lak hlim hian Mon State, Mawlamyaing (Maw La Miang) township-ah Duhua, ang chi Camera an bun tawh a, Dawei (Da We) leh Taunggyi (Tawng Ji)-ah pawh an bun chhunzawm thu Rauter News chuan a tar lang.
Mawlamyaing township-a Camera an bun hi Fiaca Company leh Naungyu Company te tangkawp te an ni a, Dawei leh Taunggyi-ah chuan Fisca ten mawhphurhna an la thung.
Heng bakah hian Kayin State, Myitkyina-ah pawh kumin atang khan Duhua, Camera an bun tawh a, Kayin State, Phaan (Pha An) khawpuiah pawh enthlakna Camera an bun niin an sawi.
Military Council ten sorkarna an lak hma, NLD sorkar lai khan Nyipyidaw leh Yangon khawpuiah CCTV Camera an bun tawh a, a bik takin Mandalay khawpuiah enthlakna Camera bun turin China, Huawei Company te nen thuthlunna lehkha an sign hnan tawh thu Media thenkhat chuan a tar lang.
Tun dinhmun thleng hian Military Council te hian Mandalay khawpuiah Huawei ten enthlakna Camera chi 300 an bun tawh a, hmalak zel an tum thu Reuter News chuan an tar lang bawk.
Nyipyitaw khawpuia an bun, Huawei Camera-ah hian hmel chhinchhiah theihna software a tel a, Yangon khawpuiah chuan Hikvision Company tena Lirthei thununna Camera an tel thu an sawi bawk.
Heng bakah hian Foreigner tena an tlawh tamna ber Pagan khawpuiah pawh Military Council ten sorkarna an lak hma pawha Tender an chhantir tawh angin Rakhine State, Sittwe (Sit tue) khawpuiah pawh kum 2019 khan China, Huawei Camera an bun tawh thu Rauter News chuan a tar lang thu hriat a ni.
Military Council te hian Myanmar khawpui bikah tinzawnin State dangah leh khawpui dangah erawh Carema bun tumna an nei lo. He project-ah hian Myanmar Company te leh China Company te nen thuthlunna chiah a la awm loh thu Rauter News chuan a tar lang.
NLD sorkar hun laia thil dik lo an chhui nana CCTV Camera project an siam chu Military Council hun a thlen meuh chuan kawngzawhtute leh active member te bakah Revolution te man nan an hmang ta thung a.
“Enthlakna Camera an dah belhna chhan hi Myanmar mite Democracy an sualchhuahna atan a hlauhawm khawp mai” tiin Human Right buaipuitu (HRW), East Asia, Vice Director Phil Robertson chuan Twitter kal tlangin a sawi.
Military Council ten February thla atanga sorkarna an lak atang hian enthlakna hmanraw chi hrang hrang an hmang tan a. Phone atanga thil en ruk theihna hmanrua pawh an bun tel thu Mobile information Company te chuan an sawi bawk.
Tun dinhmunah hian Myanmar hian Mobile Phone atanga a ruka ngaihthlakna khawl (Intercept Spyware) an bun ruk thu Information-a hnathawk, hming tar lan loh mi pakhat chuan a sawi.
Hetiang anga, hmel chhinchhiah theihna hmanrua hi ram hrang hrangah hman thin ni mah se, buaina lian tham em em a awm ngai meuh lova. Myanmar-ah thung chuan Military Council te hian an hmang uar sauh sauh a, Phuahchawp dan hmangin mipuite nghaisain an man a. Lung in tantirin thah tura an ruahman thu hi a lar hle tawh a ni.
Hetia Military Council te ten ram chhung hnukpui (Resources) zawng zawng a thunun tak vek avangin Military Council te dodal a, rawlraal che thin thalai rual te tinzawn a, enthlakna leh a ruka ngaihthlakna khawl an bun ruk avang hian tunhnai atang khan ram hrang hrang ten an dem nasat thu hriat nual a ni bawk.
