Chin State, Thantlang township-ah Military council sipai ten chung lam atanga an chet avangin zirna school zawng zawng January 16 atang khan tiam chin awm lovin an khar rih thu Thantlang township, public administration Education department ten an thuchhuahah an tarlang.
“Kan hriatsa angin Military council sipai ten zirna school leh mipui awmna hmun hrang hrang an bomb thin a. Victoria camp an bomb hnu atang kha chung lamah an thlawk kual fo thin a, kan him tawk loh avangin school kan khar tawp a ni” tiin Public Administration, Thantlang Education Department ten an sawi.
School khar chhung hian school chhehvelah infiam leh thiltihho bakah mipui pungkhawm lo turin Public Administration, Thantlang Education Department ten an sawi zui bawk.
January 10,11 khan Thantlang township-a CNF hmunpui Victoria camp, Military council sipai ten Jet Fighter-in ni 2 an bomb a. Hetia an bomb hnu hian Thantlang khawpui chung zawnah Military council Thlawhna a thlawh kual fova, bomb thlak an hlau hle a ni.
Thantlang township-ah public administration hmingin school 95 chuang a awm a, zirlai mi 15000 chuang awmin khawpui chhunga naupang 90% ten an zir theih thu hriat a ni.
