Penal code 505-A leh case hrang hrang hmanga an man Jail hrang hranga tang mi 2153 te Military council-ten May 3 thla bial (Ka Sung Lah Pih) hun dechhenin an chhuah dawn thu Military council-ten May 3 tuk khan thuchhuah an siam thu hriat a ni a.
Heng tang an chhuah tur zawng zawng te hi an fihlim vek dawn tihna a ni lova, section 401(A) case hmanga pawi khawih an awm leh chuan Jail-a khung leh an nih dawn thu an thuchhuahah an tar lang bawk.
Tuna Tang an chhuah tur te hi Tan hun ni tiam zo hnai tawh te an tam zawk thu Jail hnaivaia mi pakhat chuan RFA Media a hrilh a.
“Tuna Tang an chhuah tur te hi section 505 case hmanga man te an ni hlawm a, an tan hun tiam kum khat hmabak te an ni” tiin a sawi a.
Military council-te hian Ka Sung Lah Pih, Thal bial hun chenchhenin mipuite an rilru a lo hahdam nan leh mite tana tanpuitu an lo nih theih nan tiin an thuchhuahah an tar lang a.
Military council-ten thuneihna an lak hnu kum 2 chhungah hian Jail tang an chhuah ve nual tawh a. Tun tum chauh hi politic vanga Jail tang te an chhuah vawi khatna a ni tiin an thuchhuahah an tar lang a.
Tuna tang an chhuah hma hian kum 2021-ah te, 2023 February-ah te, April thla thlenga Jail tang chhuah turin vawi 11an puang tawh a. Ram pawna tang chhuak mi 337 leh ram chhungah mi 69417 tang an chhuah tawh thu Military council-ten an thuchhuahah an tar lang bawk a ni.
Heng Jail tang an chhuah zingah hian politic vanga tang chhuak mi 5444 an awm tia sawi ni mah se, a nihna takah chuan mi 2737 chauh politic vanga tang chhuak a nih thu Political prison pawl AAPP chuan RFA Media a hrilh a ni.
AAPP ten May 2 thlenga an chhinchhiah dan chuan Military council-ten thuneihna an lak kum 2 chhung khan Democracy sualtu zingah mi 17897 an man tawh a, heng zinga mi 5839 te Jail an tantir thu an tar lang a ni.
