Myanmar atanga ram dang kal phalna passport pe chhuak lo turin January 17 atang khan Military council ten tiam chin awm lovin an khar a. Yangon khawpui telin nikum December 26 atang khan passport siamna hmun 15 an khar tawh a ni. Heng chungchang hi Military council ten Agency hnena an hrilh dan Agency pakhat chuan RFA a hrilh.
“Passport siam tur hian tun hma angin a awlsam tawh lova, thla 5 hma atang khan ka tum thin a. tunah hetia a khar leh tak avangin kan hloh nasa hle” tiin a sawi.
NUG Labour Minister leh deputy Minister ni bawk U Kyaw Ni chuan Military council ten thuneihna an lak hnuah ram dang sumdawnna an khar vek a, Germany atangin passport siamna paper an lei thei lova, chuvanga tihtawp a ni” tiin a sawi.
Hetia passport pek chhuah an tihtawp avangin dan lova ram thenawma put ru an tam chho zel mai thei tiin Thai base, Education and Development foundation Director U Thu Chit chuan a ngaih dan hetiang hian a sawi.
“Myanmar-ah passport siamna tihtawp avangin Thai-ah leh ram danga pem hnathawk, dan lova lut an tam dawn a. Hetia an tihtawp reng chuan hnathawktu ten harsatna an tawk zel ang a, human right pal zutna a nih angin mihring hmanga sumdawnna a hluar chho zel dawn a ni” tiin a sawi.
Heng lama buaipuitu pawl IOM te chuan ram chhung dinhmun a that loh avangin thla khatah mi 40000 chuang Myanmar tangin ram dangah an chhuah thu nikum December khan an thuchhuahah an tarlang.
Military council ten hetia passport an tihtawpna chhan hi ram tan thil tum dang an neih an rin thu Assistance in Myanmar labor affairs ten an sawi.
