Military council ten Swebo (Sui Bu) khawpuiah chenna in 1600 chuang an hal chhia

0

Sagaing region, Swebo township Kya (Chia) khua, Kyauk Myint (Chauh Minh) khua leh Tin Te khuaah Military council sipai ten  February 11 atang khan ni 3 chhung khawchhung an then fainaah chenna in 1600 chuang an hal chhia a, tualchhung mi te ramhnuaiah an tlanchhiat thu tualchhung mi pakhat chuan an sawi.

February 11 atang khan Military council sipai 100 rual ten operation an neihnaah In 1000 chuang awmna Kya khuaah luhchilhin ralthuam lian an kah chiam bakah In 1000 vel an hal chhiat thu tualchhung mi ten an sawi a. Hemi hnu hian February 12-ah khan Kyauk Mynit (Chauh Minh) khuaah leh Tin Te khuaah ralthuam lianin an bei chhunzawm leh a, a khaw 2-ah In 600 chuang an hal kan leh thu tualchhung mi ten an sawi bawk.

“Ni 12 zing dar 9:00 atangin an lut tan a, ralthuam lianin an kap a, a khawpum an hal a. Kyauk Myint khua atangin an tan a, in 100 an hal a. a hnuah Tin Te khuaah in 500 leh a khaw bul Nga Su Kone khuaah in 17 a tel bawk a. February 11 khan A Sih khua, A Le khua leh Khong khua, khaw 3-ah In 1000 chuang an hal bawk a, In 1000 vel a la bang”.

Kyauk Mynit khuaah In 200 a awm a, In 100 vel a kang a, Tin Te khuaah in 600 vel an awm a, in 500 vel a kan bakah Chek In a hal kan nual thu tualchhung mi ten an sawi a ni. Heng khua mi te hi ramhnuaiah an tlanchhia a, ei in leh silh leh fen an harsa hle a, tanpui an ngaih hle thu hriat a ni bawk.

“Mipui veng himtu pawl ten tlanchhuak thuai tura an tih avangin tualchhung mipuite an tlanchhe lawk a, chawmdawlna an la dawng lo a ni ang, Social Media-ah tarlang a la ni rih lo”

Military council ten khawchhung then fai hna an thawh avangin Sagaing region-ah ni tin raltlan an pung zel a. PDF ten theih tawp chhuah rih mah se, Military council ten an nawr nasa hle a. Military council chuan KIA leh PDF ten In an hal nasa hle tiin an sawi  ve thung a ni.

Military council ten thuneihna an lak hnu hian Sagaing region-ah raltlan mi nuai 8 vel an awm tawh a,  Sagaing region mihring awm zat Zaa 15, raltlan an awm thu  ISP Myanmar ten an tarlang a ni.

Share.

Leave A Reply

Exit mobile version