Firfiak sipai hruaitu Min Aung hlaia sangawi zawnpui, ralthuam lama sumdawnna commission Thun Myin Lat telin mi 4 te chu Thailand sorkarin manin, an thil neih US dollar maktaduai 5 chuang man a laksak bakah, dan lova sumdawnna leh ruihtheih thil lam thubuai siamsakin thu zawh fiah mek an nih thu hriat a ni.
Thun Min Lat chu Thai mi 3 nen, Thailand khawpui Bangkok-ah chawlhkar hmasa lama man an ni a, ruihhlo lam kaihhawih leh black money thubuai siamsak an nih thu Thai police thupuangtu Kissana Phathanacharoen chuan heti hian a sawi.
“Tun thlengin police lamin kan la kawl reng a ni,” tiin.
Thun Min Lat chu Min Aung Hlai nen mining, hotel leh energy business lama thawk dun thin a nih rualin kum 2019-a Bangkok khawpuia ralthuam show neihnaah Min Aung Hlai nen an lo tel dun tawh bawk a ni.
Tunah chuan Thailand police kutah awmin, a hnen atanga an thil mansakte bakah thil dang finfiahna turte dap belh mek a ni a, chutih laiin Thai pawisa baht maktaduai 200 (US dollar maktaduai 5.4) vela hlutna nei a thil neihte chu mansak a nih tawh thu hriat a ni.
