Firfiak sipai hruaitu Min Aung Hlai chuan March ni 31 khan pension hun pangngai kum 60 ni thin chu kum 62 tlin hunah chauh ram tana sipai tangte an pension thei tawh dawn tih dan thar a nemngheh avangin, sipai chhungkuaah lungawi lohna a thlen thu hriat a ni.
Tuna puanzar a nih takah chuan sipai tam tak chu an lungawi lo hle a. Sipai hmuna kum 60 tling tawh pension thei tawh, kum 2 dang pawhseisak an ni chu an lungawi lo hle a.
Sipai tanglai pension mai tawh tur pakhat chuan, “Min Aung Hlai hi mi phakhar a ni. Pension tawh turte kum hnih min chhawr leh a, hamthatna pawh kan dawng lo,” tiin a sawi.
Sipai tangte an pension chuan thla tin cheng 320000 pension hlawh an la thei dawn a, tuna kum hnih an tan belh leh chhungin thla tin cheng 270000 chiah an dawng an hlawh a, hamthatna dang leh hlawhpunna pawh a awm chuang lo a ni.
Pension tep tawh sipai pakhat chuan, “Pension pawh kan dawng lova, pension hun pelh hnuah pawh hlawh pun a awm lo, kum 2 kan la tang zui dawn a. He uicho Min Aung Hlai hi meidilah a thi ngei tur a ni,” tiin a sawi.
Kum 60 bawr vel tang tawh sipai thenkhatin Min Aung Hlaia kaihhruai sipai pawl chu duh lo mah se, an kum a tam tawhin an pension tep tawh avangin, CDM zawm duh mah se, an pension hlawh chan hlauvin an tawrh tang tang thu CDM captain pakhat chuan a sawi.
Ani chuan, “Min Aung Hlai chu an duh lo. Mahse an kum a tam tawh a, pension mai tawh tur a ni tawh a, sipai hmunah an awm reng a, anni ang lehkha thiam lo ho chu gate veng, ran vulh lam an buaipui a, office lam hna thawkte chu clerk hna an thawk leh bawk a. Mahse, tunah kum 2 pawh sei leh a nih takah chuan an puak keh ta a ni,” tiin Khit Thit media a hrilh.
Chutih rualin Major rank kai tawh sipai lalte erawh chu an lawm hle a. Anni chuan side income an nei tha tawh bawk a. Hetianga sipai tan hun chhung kum pawh sei a nih takah chuan sipai tam zawk an tlan chhuah mai theih thu leh CDM zawm an tam belh theih thu bakah dan thar a awm avanga thil thlak danglam ngaite a awm zui nual tur thu pawh sipai pension hnai tawhten an sawi bawk a ni.
