Chin state, Mindat township chhunga raltlante tana ei leh bar lakluhna military council sipaiten khuahkhirh a, an man thin avangin, raltlan mipuiin vaimim leh thlaihnahte chiah an ei thin thu raltlan tanpuitu pawla committee member pakhat chuan a sawi.
“Khaw thenawma lo phun vaimimte, maipawlte chu an ei rawl ber a ni a, khaw thenkhatah chuan buhfai a awm tawh lo va, tun hma deuha pek pawh a zo vek tawh. September thla laihawl vel atang khan ei leh bar turte chu tlakchham a ni tan a. Khaw thenkhatah chuan tlem a zawng a la bang a. Mahse, hetiang renga a kal a nih chuan ei leh bar tur chu a zo vek dawn a ni.”
Miliatary council sipaiten Mindat township chhunga mipui raltlante tana ei leh bar pek tumte chu vauva an man bakah, sipaite chu Mindat khua leh Yaw kawngpuiah an inkulh bawk a, chutiang a nih takah chuan ei leh in tur phur chu a tiharsa lehzual a, Mindat khaw chhunga raltlante tan damdawi, buhfai leh ei tur tlakchhamna pawh an thleng thin a ni.
Mindat township Raltlan Tanpuitu Committee chhinchhiah dana tun dinhmuna raltlan awmzat chu sing 6 an chuang tawh a, thla 5 chhunga raltlante zinga damdawi leh ei leh in tur tlakchham vang leh vitamin tlak chham vanga thi naupang telin mi 30 vel an awm tawh thu raltlan tanpuitu pawl atanga hriat a ni.
Thuneihna latu military council pawl leh CDF-Mindat inkara inremsiamna pakhat inkahhaina chhunzawm theih a nih loh hnuah, inkahna chu a nasa zual zel a, sipai lamin raltlanna awmna camp leh khaw thenkaht thlenga a hma tel tak vek avangin, raltlan tam tak chu hmun him lamah an tlan chhe leh tih hriat a ni a.
September ni 30 khan militar council sipaite leh CDF-Mindat te chu khawchhunga an inkah mai theih thu chanchin vawrh darh a nih takah chuan tualchhung mi tam takin hlauh vangin, Mindat nena mel 18-a hla, Maguei region, Chauh-thuh khaw lama an raltlan thu hriat a ni.
