Mindat khawpuiah mahnia leisa Buhfai pawh, Military Council-te phalna lovin ei theih loh dinhmunah an thleng mek

0

Chin state, Mindat khawpuiah an rinrawl ber Buhfai chu Military Council ten an thunun vek a. Tualchhung mipuite leisa Buhfai pawh Military Council hotute phalna hmuh chauha ei phal dinhmuna an awm thu hriat a ni.

Military Council-te thuchhuah dan chuan Mindat khawpuiah hian Military Council, Infantry Battalion 274 ten Buhfai an thunun vek a. Khawpui chhungah zalen taka Buhfai lei leh hralh chhuah an phal lohna hi kum 1, a chuan tawh thu hriat a ni.

Heng dinhmun karah hian Mindat khawpui-a kohhran upate leh Buddist puithiam ten tualchhung mipuite tan tiin Military Council hotute hnenah phalna an lak hnuah Magwe (Ma Gui) Region, Pakokku (Pa Khuk Ku) khawpui lamah Buhfai an lei thin, tiin Mindat khawpuia tualchhung mi pakhat chuan a sawi.

“ Keini Kohhran leh Buddist insuihkhawmte hian mahni member-te hriattirin Fur chhunga ei in tur inchhek khawlna atan Military Council hotute kan dil thin a. Kan dilna angin Kohhran leh Buddist puithiamte hriatpuina nen Pakokku lamah Buhfai kan lei thin.  Nei lo chung chunga an sum khawl atangin chhungkaw mi 10 awmna velah  Buhfai ip 6,7 an lei laiin chhungkaw tlem deuh chuan ip1,2 an chah thin” tiin Mindat khawpuia tualchhung mi pakhat chuan a sawi.

Heng an Buhfai leisa te hi Kohhranah leh Buddist puithiam te hnenah an dah a. Military Council hotu phalna chauhin thla khat tan, chhungkaw khatah ip khat an sem thin avangin harsatna an tawk mek a. Mahni leisa Buhfai pawh chenna ina kawl thei lo dinhmunah kan awm mek tiin a sawi zui bawk.

“ Mahni leisa Buhfai chu kan ei ngei a. Chawlhkar khata ip khat ei zo chhungkua an awm ang. Dik tak chuan chhungkaw thahnem leh tlem deuh hi thliar hrang se a tha a. Chenna in pakhata ip khat theuh pek a nih avangin kan harsat phah a. Mahni Buhfai leisa pawh inah a thleng lova, kan boruak tawn hi khirh tak a ni” tiin Mindat khawpuia mi ten an sawi.

Tun dinhmunah hian Mindat khawpuia tualchhung mipuite ei in tur an chatlak mek a. Pakokku atanga an lei khawl Buhfai te pawh, mipuite hnena sem leh turin Military Council hotute an ngen leh a, vawiin thleng phalna an la pek rih loh thu hriat a ni.

August thla tir vel khan Military Council ten Mindat khawpuiah Buhfai ip khat hi K.40000 (Kyats Singli)-in ni 3 chhung an hralh chhuak a. Lei mai thei an awm angin sum harsatna avanga lei thei lo an awm avangin  Pakokku atanga Buhfai lei khawl hi sem thei hram se tiin tualchhung mi pakhat chuan a sawi.

Mindat khawpui hi Chin State-a Spring Revolution beihnaa Military Council ten ralthuam nena an beih hmasak berna Khua a ni a.  Military Council ten sorkarna an lak hnu hian Military Council-te leh CDF-Mindat-te an inkap nasa hle a, Military Council ten Martial Law an puanna hmun kha a ni.

Hetia Military Council ten Mindat khawpuia Buhfai an thununna chhan hi CDF-Mindat Battalion tan, Ration an dawn theih lohna turin an dang chat vek ang a ni, tiin an sawi.

Mindat khawpui chhunga inkahna avangin tualchhung mipui a sang tel, vawiin thlengin chenna in leh lo tlansan an la awm mek a ni.

Share.

Leave A Reply

Exit mobile version