Mindat khuaah military council sipai silai hmeh puah vangin hmeichhe pakhat a thi

0

Chin state Mindat khuaah December ni 12, zing lam khan military council sipaiten silai an tawng pawng kah avangin, in chhunga awm hmeichhe pakhat chu kap fuhin, a thih thu Mindat tualchhung mi pakhat hnen atanga hria a ni.

Mindat khua, veng thlang lam, Kanpalet kawng pennaa military council sipai check gate-ah December ni 12, chawhma lam dar 10 vel khan thalai pakhat an check laiin, an tlan chhia a, chu chu silaian an kah zuina lamah in chhunga awm kum 40 mi, Agriculture staff hmeichhe pakhat chu kah fuh niin, a thih nghal thu Mindat tualchhung mi pakhat chuan a sawi a.

“Check gate-a awmte endik a nih laiin, naupang pakhat chu a tlan chhia a, anni lamin tihthaih ang renga, an kahna lamah in chhunga awm kan u nu chu a hnungzangah a fuh a, a pum verh tlangin, a kut pawh a fuh bawk a, a thi nghal. Vui liam nghal a ni a, vawiin lamah a nu leh paten thlan siam kan duh an tih avangin, kan siamsak a ni,” tiin Mindat tualchhung mi pakhat chuan a sawi a ni.

Silaia kah fuh palha thi ta chu kum 40 mi, Daw Hlei Lai a ni a, sipai council lama nawrna avangin, a ruang chu phum nghal thuai a nih thu hriat a ni a.

Mindat khuaah military council sipaite silai tawngpawng kah vangin, Mindat khua, general administration office staff hmeichhe pakhat telin, tualchhung mi 2 chu kah fuh an lo ni tawh a, tunah pawh thihna a thlen bakah naupang pakhat pawh silai kahna hliam tuarin a awm mek tih hriat a ni.

Mindat-a military council sipaiten Mindat khua construction kawng peng bula sipai check gate-ah Chaldo khuaa Kristian pastor pakhat chu CDF nen inzawmna nei nia puhin, thu zawt fiah tura an lak thu The Mindat Post chuana tarlang a.

Chu bakah, Mindat township Shwe Aung Ta leh Chi khaw inkarah force 120 vel awmna sipai pawl leh CDF-Mindat/ PDF-ChauhTuh tangrual pawlte chu December ni 12, tlai lam dar 3:30 atanga 5 thleng an inkap a, thi leh hliam awm thu hriat a la ni lo a. Military council sipaiten Chi khaw chhunga chenna inte an tichhia a, bike pakhat an hal hal a, pawisa sing riat leh rangkachak cheng khat leh a chanve buk an ruk bawk thu The Mindat Post chuan a tarlang bawk a ni.

Share.

Leave A Reply

Exit mobile version