Chin State chhim lam Mindat khua tin zawna Military council sipaite chu CDF tangrualten Mindat-KyaukThu kawngah an lo lambun a, Military council sipai 21 an thih thu hriat a ni a.
Military council sipai 150 rualten Magway region Khuakthu khua atanga Mindat khua an tin zawn laiin May 25 atang khan CDF tangrual pawlten bomb kam hmanga an beih rawn thu CDF-Kanpalet Brigade commander chuan a sawi a.
“Mindat-ah buk khuar tumin Military council sipai 150 chuang an rawn thawk chhuak a. An kir leh hnuah mi 200 rual an rawn kal nawn leh a, Kyuakthu khaw lam kal an tum niin kan hria” tiin CDF-Kanpalet Brigade commander chuan a sawi a.
Military council sipaite hi May 25 khan CDF tangrual pawlten bomb kam hmanga an beihnaah Military council sipai 3 an thih thu CDF-Kanpalet-ten June 17 khan an thuchhuahah an tar lang a.
May 28 khan Mindat khua tin zawna Military council sipaite chu bomb kam hmanga an beihnaah Military council sipai 3 an thi a, May 29 pawh khan vawi 2 an inbeihnaah Military council sipai 15 an thih thu CDF-Kanpalet-ten an thuchhuahah an tar lang bawk a ni.
Kanpalet khawchhunga Military council sipai buk khuar te chuan ralthuam lian vawi 10 zet an bomb a, mipui thi leh hliam an awm lova, Pre-school leh sakhaw biak in an chhiat nual thu hriat a ni a.
Military council sipaite hian Kanpalet khawchhung Administrator office, Education office, High school No. 1, Forest office, Buddhist school, police station velah Military council sipai 20,30 vel an duty thu hriat a ni bawk.
